PCG andam na para sa fluvial karong Sabado

SIYENTO porsiyento na nga andam ang Philippine Coast Guard (PCG) alang sa ipahigayon nga fluvial procession sa balaang bata nga si Snr. Sto. Niño karong Enero 14 Sabado, subay sa umaabot nga kasaulogan sa Sinulog.

Matod ni Cebu Coast Guard Station Commander Dionilett Ampil nga ilaha gihapong sundon ang naandan nga rota sa fluvial procession, diin gikan sa Ouano wharf isakay sa Galleon ang imahen ug dad-on ngadto sa Pier 1 aron sa pag-procession niini paingon ngadto sa Basilica Minore del Sto Niño.

Subay niini, giawhag ni Ampil ang mga operator og barko ug motorbanca nga buot mosalmot sa pro­sesyon sa pagparehistro na sa ilang mga sakayan.

Kini human sa kasamtangan nga wa pay bisan usa ka barko ug motorbanca ang nagparehistro sa ahensiya diin lakip nga wa marehistro ang Galleon nga sakyan sa imahen sa balaang bata.

Atol sa coordination meeting sa PCG, PCGA, Navy, Maritime Police, Red Cross, ug BFAR kagahapon, gitug-an ni Ampil nga ang mga naasoyng opisina, nipasalig sa pag-deploy og water asset ug pag-augment og sea marshalls sa matag barko ug motorbanca nga magpa-rehistro.

Lakip nga ilang gituki ang pag-categorize sa mga barko alang sa ilang formation atol sa fluvial procession, diin did-an sila nga makaduol sa Galleon, ilabi na kadtong mga sakayan nga miapil apan wa makaparehistro diin adto lang sila ibutang sa tumoy nga bahin sa prosesyon.

Matod ni Capt. Ralph Yap, Deputy District Director for Operations sa PCGA, nga wa na silay mahimo niadtong mga motorbanca nga wa makaparehistro ug pasagdan lang kini nilang makaapil sa fluvial procession.

Gipahinumduman usab niini ang publiko nga gidili ang pagdala og balloon, ilimnong makahubog, hait nga hinagiban, armas, ug pabuto sud sa mga barko ug motorbanca atol sa kalihukan, diin duna usab silay ipanghatag nga safety regulations atol sa pagparehistro sa mga barko.

Kadtong moapil sa fluvial procession, molukat lang og special permit sa Marina 7.

Lakip nga ipakatap sa kalihukan, ang ilang medical teams ug emergency and rescue unit aron dali silang maka-responde sa higayon nga dunay mga untoward incident nga manghitabo.

Sa laing bahin nagsugod na ang Coast Guard og pagpakatap na sab sa tanan nila nga K9 units ngadto sa mga pantalan sa siyudad ug lalawigan sa Sugbo, subay sa hulga sa terorismo tungod sa insidente sa pagpamomba sa Hilongos, Leyte.

Gawas niini, inspeksyunon usab pagbalik sa ahensiya ang mga bagahe sa mga pasahero nga moabot sa mga pantalan sa Sugbu, diin ilang gipangayo ang panabot sa publiko labot niini.

Way nadawat nga intelligence report ang PCG labot sa hulga sa pagpamomba.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph