KON way pag-usab sa direksyon ug lihok, dako ang posibilidad nga moigo sa Sugbo karong Lunes ang naporma nga dautang panahon nga nakasulod na sa Philippine Area of Responsibility sa miaging adlaw.
Ang low pressure area nasigpatan kagahapon sa hapon nga naa sa 465 kilometros silangan-habagatang-silangan sa Hinatuan, Surigao del Sur sa Mindanao.
Si Romeo Aguirre, weather specialist sa Philippine Atmospheric, Geophysical and Astronomical Services Administration (Pagasa) Mactan, niingon nga ubos pa sa 60 kilometros matag takna ang dala nga hangin sa LPA nga nag-irog sa kasadpan-amihanang-kasadpan o westward.
Matod niya nga base sa tracking, ang entry point sa LPA kay ang Caraga Region sa Mindanao ug hayan karong Lunes sa hapon, ang sentro niini duol sa Sugbo.
Si Aguirre nipasabot nga dako ang posibilidad nga moigo sa Sugbo ang dautang panahon tungod kay sa Mindanao kini manukad ug sa Bohol o Leyte kini moagi diin maapektahan ang Sugbo.
Kon mahimo kini nga bagyo, tawgon kini og Auring, ang labing una nga bagyo unya sa 2017.