GIHAYA na ang usa ka 10-anyos nga batang babaye nga gituohang gipatay sa aswang gumikan sa daghang tusuk-tusok sa iyang lawas didto sa Braulio E. Dujali sa Davao del Norte.
Subay sa impormasyon nga migawas sa TV Patrol Southern Mindanao, ang biktima nailhang si Holy Rose Buot, estudyante sa maong dapit.
Ang inahan nga si Noemi Buot, hamtong, namahayag nga daw "gimino" sila sa ilang pagkatulog gumikan wa gayud sila nakamatngon sa panghitabo.
Samtang, ang apuhan nga si Nenita Cruda, di sab makatuo sa nahitabo gumikan sa daghang pinaakan sa lawas ug nanglagom ang likod nga bahin sa biktima.
Nasayran nga Martes sa buntag na nila napalgan ang biktima nga nanglagum ug wa nay kinabuhi kinsa nakaangkon og daghang samad sa lawas.
Dako ang pagtuo sa mga kabanay ug sa mga silingan nga aswang ang mipatay sa biktima gumikan nabaniog sa dapit ang pagpakita sa dakong langgam panahon sa gabii.
Apan si Inspector Andrew Lupian, deputy chief sa Braulio Dujali Police Station, nagsulti nga subay sa ilang inisyal nga imbestigasyon, lagmit gipaak og banakon nga bitin ang biktima.
"Pagpunta ng pulis doon, may nakita na parang mga bites, parang mga kagat ng ahas," sulti ni Lupian sa pakighinabi ni ABS-CBN reporter Claire Cornelio.
Bisan pa man sa migawas sa imbestigasyon sa mga pulis, dako gihapon ang pagtuo sa mga kabanay nga aswang ang mipatay sa 10-anyos.
Sukad sa pagsuwat ning balita, wa pa migawas ang resulta sa medico legal gikan sa pag-autopsy sa biktima.
Sa Huwebes nakatakdang ilubong ang biktima sa Braulio Dujali Public Cemetery.