Oro-MisOr mobalos sa Davao karong Sabado

SULAYAN sa Cagayan de Oro-Misamis Oriental (CDO-MisOr) All Stars nga makabalos sa Davao All Stars pag-agbat nila sa ikaduhang hugna sa CDO-MisOr vs. Davao Goodwill 12-board Chess Teamplay Match karong Sabado sa buntag didto sa Barangay Tablon Gym.

Naunhan sa Davao All Stars ang host CDO-MisOr agi sa 12-10 hingpit sa unang panag-atbang niaging tuig.

Buot manimalos ang CDO-MisOr karon agi sa ilang igong line-up nga gilangkoban og tulo ka National Master (NM) nga sila Rustum Tolentino, Levi Mercado ug ang unang Kagay-anong NM nga si Gerry Nodado.

Naa sab sa regular board assignments sila Lennon Hart Salgados, Allan Cantonjos, Jeriel Manlimbana, Nazario Ubanan, Antonio Chavez, Basilio Pandan Jr. ug Bryan Jose.

Sa kataposan duha ka board assignments sa ika-11 ug 12 mao sila Ismar Irenick Estrella ug Domingo Oga.

“Gikinahanglan nato nga matabla sa 1-1 atong lifetime score batok Davao ug uhaw ta mobalos,” ingon ni Estrella, kinsa ang team captain sa CDO-MisOr.

Gilangkoban sab ang regular boards sa Davao nila NM Alexander Lupian, NM Cedric Magno, Jason Salubre, Henry Lopez, Harrison Maamo, Lyndon Sombilon, Reynaldo Quinonez, Jimmy Dano, James Infiesto ug Rhyan Arce.

Sila Engineer Allan Diez ug Darwin Bermudez naa sab sa executive boards.

Human sa torneyo pagasugdan dayon ang 4th Tablon 3-board Mixed Chess Team Tournament.