Asawa ‘gisungkab’ ni kumpare

GIINGONG buot magpakamatay ang usa ka bana human naaktuhan ang iyang asawa nga nakighilawas sa iyang kumpare niadtong Huwebes, Enero 5, alas 11:30 sa Capistrano-Macahambus, dakbayan sa Cagayan de Oro.

Nagpatala sa kapolisan ang bana nga si Rey (dili tinuod nga ngalan), 38, usa ka security guard nga taga Macanhan ning dakbayan.

Ang asawa nailang si Verly (bansagon gitago), 33 samtang ang kumpare niini nga gika-sex usa ka driver.

Sa nahipos nga impormasyon gikan sa Police Station 1 sa Divisoria, gikabutyag nga nagpatala sa kapolisan ang bana tungod kay wala nakasabot sa iyang gibati dihang naaktuhan ang iyang asawa kauban ang kumpare niini sa boarding house sa lalaki.

Gikabutyag nga mi-adto sa boarding house sa kumpare nga drayber ang bana kay wala niini naabtan sa ilang panimalay ang iyang asawa ug aduna na kini namatikdan nga kadudahang lihok niini.

Nakadungog na usab og mga estorya ang bana tali sa iyang asawa ug kumpare.

Nagpaabot pa kini og mga 30 minutos sa dihang nakitang sirado ang lawak sa iyang kumpare ug nadungog na lang niini ang tingog sa duha sulod sa lawak.

Dako ang kakurat sa dihang nakumpirma nga ang iyang asawa ug kumpare ang anaa sa maong lawak sa dihang nakitang nanggawas ang duruha hinungdan nga wala kini maka-agwanta ug gibunalan niini og kahoy ang lalaki.

Dali usab nga nisibat ang duha atol sa maong panghitabo hinungdan nga wala na’y nahimo ang biktima gawas sa pagpatala.

Sa pagkakaron, padayon pa ang imbestigasyon sa kapolisan ug nagpaabot pa sa pagbalik sa biktima kung ugaling padayon kini nga mopasaka.