NUNOT sa pagsibog sa oras sa pagpamaligya sa mga sidewalk vendor sa merkado sa Cogon ning dakbayan sa Cagayan de Oro daghan sa mga mamaligyaay ang nabalaka nga basin unya wala na silay kitaon niini.

Usa ka mamaligyaay nga si Ruel Ignacio nibutyag sa SunStar SuperBalita nga posibleng gamay lamang ang ilang kitaon kon itandi niadtong niaging tuig nga alas 5 sa hapon gitugotan na sila sa pagpamaligya diha sa kadalanan.

“Kadto man gud sa alas singko kay maoy tinggawas sa mga empleyado unya moderetso dinhi hinungdan kusog gyod ang halin,” rason niini.

Gidugang usab niini nga ang alas 5 sa hapon paingon sa alas 8 sa gabii mao gayud ang kusog og halinon.

“Kanang alas 9 hinay nana kayo, mobalik pagkusog kanang alas 3:30 sa kadlawon paingon sa alas 6 sa kadlawon. Depende pod gihapon sa panahon,” butyag niini.

Gibutyag ni Ignacio nga aduna silay saktong kita sa pagpamaligya diha sa kadalanan ug usa sa gikabalaka nga basin gayud walay kitaon sa pagsibog sa oras.

Ang Roads and Traffic Administration taliwala sa clearing operation niadtong adlaw’ng Miyerkules, Enero 4, gitugotan gihapon ang mga sidewalk sa pagpamaligya sa kadalanan apan gisibog kini ngadto sa alas 9 gikan sa alas 5 sa hapon paingon sa alas 6 sa buntag.

“Malipay na lang gyod gihapon mi kay gitugotan bisan nga gabii na kaayo kaysa wala gyod gitugtan,” matod ni Ignacio.

Una na nga gibutyag ni Task Force Hapsay Dalan Chairman Edgardo Uy nga gisibog kini nila tungod kay ang maong oras dili na kaayo mohuot ang dagan sa trapiko sa dapit.

Gihingusgan usab ni Uy nga adunay ordinansa ang dakbayan nga mao ang City Ordinance 10551-2007 nga hawanon ang kadalanan sa mga mamaligyaay aron dili makabalda sa dagan sa trapiko.