ANG pulang manggugubat nga sakop sa New People’s Army (NPA) Comval Davao East Coast Sub-Regional Operations Command nagbutyag nga sila ang nagsilbi sa kamanduan nga disarmahan ang panatiko nga paramilitary group nga Mandaya Ancestral Defense Unit (Manadu) dihang miatake sila niadtong Disyembre 30 sa Sitio Calatagan, Barangay Poblacion, Caraga, Davao Oriental.

Sa gipadalang suwat, pamahayag sa NPA nga gipirmahan ni NPA-Comval Davao East Coast Subregional Command spokesperson Roel Agustin II isip pagdepensa, ang NPA nakig-away ug nakapatay sa ilang giingon nga warlord nga si Cupertino Banugan, iyang igsuon nga si Ramon ug parente nga si Dodo Banugan.

Suma ni Agustin, ang pulang manggugubat misakmit sa duha ka tag-as nga matang sa armas nga miangol sa upat ka NPA sa ilang pinusilay.

Dugang niya nga ang pag-antus sa masa sa Caraga nawagtang tungod sa kamatayon sa mga biktima, kinsa giabagan sa Armed Forces of the Philippines, nga maoy nagkontrol sa pesante ug komunidad sa mga Lumad sa Caraga sukad pa sa rehimeng US-Arroyo ilawom sa Oplan Bantay Laya nga kontra rebolusyonaryo nga kampanya.

Alegasyon sa NPA nga si Cupertino migamit sa iyang titulo isip tribal chieftain aron pahimuslan ang 14,000 ektaryas nga luna nga gipanag-iyahan sa pamilyang Iligan, Bayon, Silat, Tibay, ug Panin sa Caraga nga sistematikong giabangan.

Giingon sa rebeldeng grupo nga si Cupertino, nangolekta og 10 porsyento gikan sa gross nga kita sa abaca ug uban pang produkto sa mga mag-uuma. Mangolekta sab og 10 porsyento gikan sa mga proyekto nga ibutang sa ilang lugar. Nangolekta og salapi gikan sa 300 ka pamilya kinsa biktima sa Bagyong Pablo.

Sa unang pahayag sa pamilya ug otoridad, ang biktima gipatay sa mga rebelde tungod sa lig-on nga pagpakigbatok sa mga biktima kalihukan sa NPA.

Mga rebelde, suma sa militar, maoy suliran sa katawhan sa Caraga tungod sa ilang padayong pagpangilkil ug pagpangayo og revolutionary tax sa mga negosyante nga hugot gikondena sa mga biktim.