ROSQUILLOS ug Parola. Kini ang duha ka mga butang nga mosantop sa atong alimpatakan kon kita maghisgot mahitungod sa lungsod sa Liloan.

Apan mas nabantog ang rosquillos tungod kay kanunay kining pangitaon sa mga dayo kon mobisita sa maong lungsod aron mopalit og pasalubong.

Ning bag-o lang, nahimong malampuson ang gi­pahigayong Rosquillos Festival sa lungsod atol sa kapistahan ni San Fernado-Rey sa ilang parokya.

Matod pa ni Mayor Duke Frasco nga mokabat sa 15,000 ka mga Liloanon ang midagsa sa ilang ika- unom nga Roaquillos Festival niadtong Huwebes.

Sa pagbisita ning mantalaan sa maong lungsod, personal nga gikahinabi sa Sun.Star Superbalita, si Atty. Thel­ma Jordan nga maoy chairman sa over-all fiesta celebration ug sa ilang festival.

Iyang gipaambit sa Sun.Star Superbalita nganong Liloan ang dagsaon kon rosquillos na ang hisgutan.

Saysay ni Jordan nga ang Rosquillos festival sa maong lungsod nahimo human napasar sa konseho ang usa ka ordinansa niadtong 2009.

“We were tasked to find a festival (before) nga ma­ka-represent sa tibuok lungsod, something that has provided livelihood ug nakapa-know sa lungsod.” Gipaambit ni Jordan nga ang paghimo og rosquillos sa mga Liloanon maoy nag- unang panginabuhian sa lumolupyo niadto hangtod karon.

“Daghay naka-eskwela, daghay nahimong propesyunal tungod sa panginabuhi sa ilang ginikanan nga paghimog rosquillos,” ni Jordan.

Dugang niya nga gawas sa Titay’s nga maoy nailhang brand, daghang mga panimalay ug cottage industries sa Brgy. Jubay ug Brgy. Cot-cot Ang naghimo gihapon og rosquillos.

Bisan ang mga bukidbukid nga barangay aduna manghimo og rosquillos, ni Mayor Frasco.

Ang paghimog rosquillos sa mga taga Liloan, matod ni Jordan, nakapaumento sa pagpuyo sa mga lumolupyo tungod kay daghang mga nilampos sa pagtuon tungod ini.

“Making rosquillos has been part of the culture, part of the identification of a Liloanon nga dinhi ug naa gyud tay rosquillos,” padayag niya.

Rosquillos Festival

Gitataw ni Frasco nga mas bongga ang pagsaulog sa Rosquillos Festival ning tuiga. Mas daghan ang misalmot nga mga barangay karon itandi sa una.

“Every year it gets better and better,” matod niya.

Sa festival, aduna kini tulo sa mga kategorya: street dancing, festival showdown, ug festival queen.

Ang Pundok Lungsuranon sa Poblacion ang overall champion sa ritual showdowm category. Gawas sa cash prize nga P100,000, makadawat usab og P500,000 nga balor sa proyekto ang barangay gikan sa lungsod.

Ila usab nga nakuha ang Best in Andas nga may P10,000 nga premyo ug ikaduha sila sa Street Dan­cing nga may P40,000 nga premyo.

Samtang ang Banay Jubaynon ang nahimong over-all 2nd place ug may P70, 000 ug mao usay milangkat sa Street Dancing Category ug Best in Audio Van. Ang maong banay nakadawat ug P120,000 nga kinatibuk-ang cash prize.

Sa ikatulo nga pwesto mao ang Nagkahiusang Ba­n­ay sa San Roque nga nakada­wat ug P50,000.

Ikaupat ang Tribu Yatianon nga mao usay nahimong 3rd place sa Best in Andas. Sa ikalimang pwesto mao ang Brgy. Catarman nga may P15,000.

Festival Queen

Gikoronahan isip Rosquillos Festival Queen 2015 ang 16 anyos nga pambato sa Mahugyawong Vicentehanon sa Brgy. San Vicente nga si Edelie Chin Tautho nga mao usay misungkit sa Best Opening Introduction Award.

Ang representante sa Brgy. Yati nga R-Jane Lugod ang 1st runner up ug Miss Photogenic.

Ang taga Brgy. San Roque nga si Crystal Diolan ang 2nd runner up ug Best in Costume.

Si Tresha Enriquez sa Jubay ang 3rd runner-up ug best sa Solo Performance. Ang pambato sa Poblacion nga si Cha­rity Renquillo ang 4th runner-up. (Dugang taho nila ni Faith V. Leceña ug Joanna Marie A. Tejas, CNU Communication Interns)