TALISAY City Prosecutor’s Office (TCPO) ni-inhibit sa kasong arson nga giatubang ni Mayor Johnny delos Reyes (JVR) nga gipasaka mismo sa iyang kaugalingong kapulisan sa dakbayan sa Talisay.
Ang mayor gipasakaan og kasong arson sa iya kanhing hepe nga si Supt. Reycel Carmelo Dayon.
Apan usa ka saksi sa maong kaso nisibog na karon sa iyang pamahayag nga ang mayor misunog sa usa ka mini dumptruck niadtong Marso ubos sa costudy sa Talisay police station.
Ang kaso naa na sa TCPO, apan kampo sa mayor nisang-at og motion for inhibition aron buhian sa TCPO pinangulohan ni City Fiscal Marshal Rubia ang kaso sa mayor ug laing unom ka mga kauban.
Wala pa man ka sugdi ang preliminary hearing tungod sa pagtuo nga bias ang mga prosecutor base usab sa ilang mga pamahayag nga dili pabor sa mayor.
Karong bag-o, ang TCPO nipagawas na sa ilang desisyon nga ila na lang nga buhian ang maong kaso ug ila kining itugyan ngadto sa Regional State Prosecutor Fernando Gubalane nga maoy modesisyon kon si kinsa ang mohupot sa maong kaso.
Ilang gitataw sa ilang report nga walay basehanan ang pasangil sa mayor ngadto kanila nga bias.
Busa, alang sa pagwagtang sa ilang pagduda, TCPO bulontaryo nilang buhian ang maong kaso.