GIILA sa Kapitolyo nga usa ka “slow disaster” ang nasinati karon nga kainit sa Sugbo.

Tungod niini, gitinguha sa kagamhanan nga matubag usab kini dayon sa di pa mograbe ang epekto niiini.

Usa sa mga lakang nga pagahimuon sa Kapitolyo ang pag-apod-apod og mga water container sa mga dapit sa Sugbo nga matumbok nga maoy labing apektado niining nasinati nga talagsaong kainit.

Sigun sa Provincial General Services Office nga duna na silay mga supplier nga gi-contact nga maoy kuhaan sa mga materyales nga gikinahanglan.

Matod sa labaw sa Provincial Disaster Risk Reduction and Management Office, Baltazar Tribunalo, ang mga sudlanan sa tubig magamit unya alang sa pagkolekta sa tubig-ulan karong buwana nga maoy gitagna sa Philippine Atmospheric Geophysical Astronomical Services Administration (Pagasa) nga mahitabo ang pag-uwan.

Lakip sa plano sa Kapitolyo mao ang paghatag og emergency employment assistance sa mga lumolupyo sa mga dapit nga apektado sa grabeng kainit.

Lakip sa ipatrabaho kanila bugti sa ilang sweldo mao ang paghimo og water impounding facility kun pundohanan sa tubig nga makaipon sab og tubig panahon sa ting-uwan.

Samtang matod ni Gobernador Hilario Davide III nga wa pa matumbok kon pila ang ihatag nga suhulan alang niadtong mga mopahimulos sa emergency employment assistance gikan sa Kapitolyo.

Dugang sa Kapitolyo nga agi usab og pagpalig-on sa ilang mga preparasyon batok sa paglungtad sa El Niño mao ang hingpit nga pag-estblisar og mga pasilidad nga makatabang sa mga local government unit (LGU) panahon nga dunay moigo nga susamang sitwasyon.

Gihangyo sa provincial government ang mga dapit nga apektado sa kakuwang sa suplay sa tubig nga mohimo og kaugalingon nilang pagpangandam aron matubag ang suliran sa init.

Gawas sa mga sudlanan sa tubig, andam na ang mga food pack nga maoy ipang-apud-apod sa Kapitolyo ngadto sa mga residente sa mga dapit sa Sugbo nga apektado sa grabeng kainit.

Samtang karong semanaha usab mamalit na ang Kapitolyo og mga school supply nga maoy ipanghatag ngadto sa mga tinun-an nga wa pay magamit niining pagbukas sa klase.

Matod sa executive assistant sa governor’s office, Rocelyn Zosa, mohimo og emergency purchase ang Kapitolyo aron pagpalit sa gikinahanglan nga school supplies.

Kini agi og ayuda ngadto sa mga tinun-an nga wa makapalit og gamit sa eskwela tungod sa menus nga kita sa ilang mga ginikanan, mugna sa grabeng kainit.

Dugang ni Zosa nga ila pa hinuon sutaon kon kinsa ang hatagan niini, ilabi na kay di man usab tanang pamilya nga apektado sa kainit ang dunay mga estudyante.

Una ning higayon nga lakip sa ipanghatag sa Kapitolyo ang mga school supply human gideklarar ang state of calamity.

Kon mapalit na ang tanang school supplies nga ipanghatag, hayan masugdan na ni sa pagpanghatag sunod semana.

Karong semanaha, unahon pagpanghatag ang mga food supply sa mga pilot area nga maoy napilian sa Kapitolyo.

Matod ni Zosa nga unahon kini sa pag-apud-apod sa Sibonga ug Barili karong Miyerkules. Isunod sab unya ang Barili, Toledo ug Pinamungajan.

Nanginahanglan og mga volunteer ang Kapitolyo nga makatabang sa repacking sa dugang suplay nga ipanghatag sa mga apektadong dapit.

Ang pagpanghatag sa mga food ug school supply kabahin sa phase 1 plan nga giandam sa Kapitolyo, subay sa ilang pagtubag sa suliran sa grabeng kainit dinhi sa Sugbo.