HAPSAY ug malinawon ang pag-abli sa klase sa elementary ug high school lakip na ang kindergarten sa tibuok dakbayan sa Sugbo.

Kini ang paghulagway ni Superintendent Rhea Mar Angtud sa Department of Education-Cebu City human sa iyang pagsuroy sa mga tunghaan ug base sa report sa iyang mga district supervisor ug mga school principal.

Sa Barangay Ermita, gidagsa sa mga tinun-an gikan sa kindergarten hangtod sa grade 3 ang ilang bag-ong eskwelahan nga gi-donate sa Ramon Aboitiz Foundation Inc. nga nagsilbing extension sa Cebu City Central School (CCCS).

Ang upat ka andanang edepisyo nga adunay 12 ka lawak dili pa mahimong independente sanglit wala ma makumpleto ang unom ka year level sa elementar­ya gumikan sa kakuwang sa edepisyo ug lugar.

Si Lyra Illaga, Principal III sa CCCS nagkanayon nga adunay walo ka magtutudlo pinangulohan ni Assistant Principal Reum Sespeñe nga maoy moklase ug modumala sa kapin 400 ka mga tinun-an nga pulos taga Ermita.

Usa ka 10 anyos nga tinun-an sa grade 2 nga si Jemlord Reponte kanhi nag-eskwela sa CCCS ug apan niundang gumikan sa kawad-on sa ilang pamilya nalipay sa pagtumaw sa tunghaan sa ilang barangay.

Si Kapitan Imok Rupinta sa Ermita nagkanayon nga dako og ikatabang ang maong tunghaan sanglit dili na kinahanglan nga mobiyahe og kalima matag buntag ug hapon ang ilang bus aron paghatod ug kuha sa mga tinun-an kinsa nieskwela sa CCCS ug sa silingan nga mga barangay..

Matod niya nga sukad niadtong 1954 hangtod 1998, 11na ka mga bata ang naligsan gumikan sa pagbaktas paingon sa eskwelahan.

Aron mahingpit og mahimong Barangay Ermita Elementary School, buot sa barangay ug kagamhanan sa siyudad nga paliton ang kapin 1,000 metro kwadrado nga nahimutang atbang sa eskwelahan apan mahal gihulagway nga mahal ang baligya.