GITATAW ni Giovanna Raffiñan, principal sa Mandaue City Central School (MCCS), nga di sila mobalibad sa mga tinun-an nga late na magpa-enroll.

Apan, ang principal mihanyo ngadto sa mga ginikanan nga kung mahimo, ipa-enroll gilayon ang ilang mga anak aron di kini mabiyaan sa klase.

Mga late enrollees maoy bugtong problema sa duha ka mga dagkong tunghaan sa Mandaue nga mao ang MCCS ug Mandaue City Comprehensive National High School (MCCNHS).

Gawas sa late enrollees, mga tinun- an ug mga ginikanan nga wa makatultol sa ilang mga lawak-saringan maoy nasugatang problema sa MCCS.

Saysay ni Raffiñan nga ilang gihimo nga mao ang pagtapok sa mga tinun-an ug ginikanan sa administration building ug mismong mga magtutudlo sa mga tinun- an maoy mitultul kanila sa classroom.

Gitataw ni Raffiñan nga sa unang adlaw sa klase, aduna gihapoy mga nagpaenrol kagahapon.

Paambit niya ning mantalaan nga mokabat sa 4, 101 ka mga tinun-an gikan sa kinder hangtod sa Grade 6 ang misud sa unang adlaw sa klase sa MCCS ug gipanglantawan nga kini mas motaas  sa mga sunod nga adlaw.

Dason ni Raffiñan nga wa silay pagkuwang sa lawak saringan ug matutudlo sa ilang tunghaan sa gipahigayong 97 ka klase kagahapon.

Samtang gipaambit usab sa principal sa MCCNHS nga si Reina Perez sagad rason sa late enrollees sa ilang tunghaan mao ang bag- o lang pag-abot sa mga tinun-an gikan sa bakasyon.

“Bisan sa among pagpahibaw sa schedule sa enrollment, naa gihapoy mipa-enroll nato mga less than a hundred,” ni Perez.

Dugang niya nga lakip sa nakatampo niini mao usab ang availability sa mga magtutudlo nga misalmot sa usa ka seminar sa miaging semana.

Gubutyag ni Perez nga adunay 1, 100 ka enrollees ang ilang Grade 7 sa unang tuig sa implementasyon sa K+12 curriculum.

Ang MCCNHS dunay 3,500 nga populasyon sa mga tinun-an matag tuig, paambit niya.