MAKADASIG nga nagkasinabot sa miaging special session sa Huwebes ang Konseho sa Syudad sa Sugbo nga suportahan ang solusyon sa krisis sa basura nga giduso ni Mayor Tomas Osmeña.

Mao kini ang pagkuha og usa ka service provider nga gi­ga­­hinan og P25.5 milyones nga pundo alang sa buwan sa Enero.

Atong nasabtan nga mao na ni ang katapusang emergency procurement kay ang sa sunod mga bulan ipaagi na sa regular nga bidding.

Di na kini lisudlisuron pa sa mayoriya sa Konseho nga mao ang Team Rama kay wa man gitago kanila ang maong transaksyon. Mahimo silang ngil-ad sa mata sa mga Sugboanon kon ila pa kining babagan. 

Ambot kon tinuod ba ang hungihong nga usa ra diay ka konsehal nga wa sa Sugbo Enero 3. Mao kini kadtong wa gidayon ang emergency session sa Konseho tungod kuno sa kawalay quorum. Apan walay hisgot kon si kinsa sa Team Rama ang out-of-town. Matod pa sa hungihong, si Konsehal Edu Rama ra diay ang wala sa Sugbo. Ambot kon ngano man sab nga wala gitino sa mga sakop sa media kon tinuod ba gyud diay nga walay quorum.

Kon tinuod man, makai­ngon kita nga daw gilangay ang solusyon sa maong krisis sa basura. Apan, sa miaging Biyernes, wa nay rason nga mobabag pa. 

Sa panahon ni kanhi mayor Mike Rama man gud kulang man gud sa giingong transparency ang transaksyon sa basura.

Dayon, wa maapil sa pagkwenta niadtong tungora ang mga trak sa Syudad nga nangaguba ug nagyaka na lang karon ug ang gasto sa gasolina.

Karon, trabaho na sa Jomara Konstrukt, ang nakuha nga service provider, ang paghakot sa basura gikan sa mga transfer station ngadto sa ilang nakuhang labayanan.

Alang kanako, mas maayo gyud kining transaksyon nga transparent aron walay sami. Ug moguwa nga mas hapsay ug epektibo kining sistema karon nga ihatag ang tibuok responsibilidad nga mohakot sa basura gikan sa transfer station ngadto sa service provider.

Senyor

Tayming gyud kaayo nga nahitabo kining pag-uyon sa Konseho aron mahipos na ang basura sa Syudad sa Sugbo atol sa pag-abli sa semana kasaulogan sa Pista ni Senyor Santo Niño.

Motuo gyud ko nga dunay kalabutan ang Senyor niining maong kalambuan diha sa City Hall.

Basi sa kasaysayan man gud, magkahiusa ang mga Sugboanon batok sa lain-laing mga hulga kon naa ang Senyor sa ilang tunga. 

Mao kini ang atong nakutlo samtang nagbasa mismo niining labing bag-ong libro kabahin sa kasaysayan nga sinulat ni Resil Mojares sa University of San Carlos Press.

Ang libro nga “The Feast of the Santo Niño” opisyal nga ilusad pa anha sa Bisilica Mi­nore del Santo Niño inig “Hu­bo” apan ang mga interesado mahimong mokontak kanako pinaagi sa social media.

Karong natapos na kining isyu sa basura, daw hiusa na kitang moatubang sa mas ser­yuso nga hulga sa atong kasaulogan nga mao ang terorismo.

Makaingon kita nga seryuso ang maong hulga labi na human sa pagpamomba karong bag-o didto sa Hilongos.

Bisan pa man, malaumon ko nga panalipdan kita ni Senyor Santo Niño. Dili Siya motugot nga dunay dautan nga mahitabo sa iyang kapistahan. (@anol_cebu sa Twitter)