ANDAM ug tagana si kanhi International Boxing Federation (IBF) flyweight champion Johnriel Casimero nga moaway sa iyang kataganasod nga si IBF defending superflywweight champion Jerwin Ancajas.

Kini maoy gibutyag ni Sammy Gello-ani kinsa mao karon ang handler ni Casimero.

Matod ni Gello-ani nga dako ang iyang pagtuo nga mosaka ang rating ni Casimero sa superfly category sa IBF, World Boxing Organization (WBO) ug sa World Boxing Council (WBC) karong buwana.

Dugang ni Gelloani nga kon makadesider ang IBF nga paawayon sila batok ni Ancajas, ila gilayon kining lihukon.

Hinuon giangkon ni Gello-ani nga ang panagsangka tali sa pulos Pinoy alang sa world title dili kaayo mokita kon pinansiyal ang hisgutan.

Si Ancajas adunay 25-1-1 win-loss-draw record nga may 16 ka knockouts. Sa unang higayon modepensa siya sa iyang titulo batok sa Mexicanong si Jose Alfredo Rodriguez nga mitala og 32-4 record ug may 19 ka knockouts karong Enero 29 sa Macau.

Samtang gipadayag usab sa kampo ni Ancajas nga andam usab silang moaway bisan kinsa nga mamahimo nilang mandatory challenger.

Si Joven Jimenez, ma­na­ger ni Ancajas, sa usa ka interview mipabuhagay nga wala silay gilikayan bisan og si Casimero pa ang ilang makontra.