GISUMBAG sa suspetsado nga babaye ang usa ka tinun-an human kini nabantayan nga misulay sa pagkawat sa pitaka sa iyang inahan niadtong Biyernes mga alas 3:30 sa hapon diha sa JR Borja Street, Barangay 39 ning dakbayan sa Cagayan de Oro.

Ang biktima nailang si Valentino Barcelona, 24, taga Baungon, Bukidnon samtang ang suspek nga nakasibat ang nailang si Ginay Anay pinaagi sa file sa kapolisan sa kapolisan nga positibong gitudlo sa biktima.

Sa nahipos nga impormasiyon gikan sa Police Station 2 (SP2) sa Cogon gikabutyag nga samtang anaa sa dapit ang mga biktima kalit lang nipaduol ang maong babaye apan namatikdan sa estudyante nga gisulayan niini sa pagkuha ang pitaka sa iyang inahan hinungdan nga iya kining gisita.

Giingong nasuko ang maong suspetsado ug gisumbag si Barcelona hinungdan nga maayong pagkaigo sa mata ug gisulayan pa pagdunggab gamit ang barbeque stick maayo na lang nakalikay ang biktima.

Dali nga misibat ang suspek apan naila kini pinaagi sa mga hulagway nga gipakita sa mga otoridad ngadto sa biktima. Nahibaloan nga ilado na kini nga kawatan sa maong dapit.

Sa pagsulat niini nga balita ang maong insidente ang nakatala na sa buhatan sa kapolisan sa PS2 sa Cogon alang sa tukmang disposasiyon.