ANG unang Davao Region Scuaa Meet 2017 ipahigayon sa Enero 25 hangtud 28 didto sa Davao Oriental State College of Science and Technology sa Mati City, Davao Oriental.
Matud ni University of Southeastern Philippines (Usep) sports director Jose Alther Rivera sa Facebook chat sa Sun.Star Davao, ang Usep magpadala og duha ka tim sa regional meet, Teams A ug B,din duna kini lima ka eskuwelahan.
Si Rivera, kinsa trainer sab sa Usep Obrero athletics team, miingon nga lima ka "state universities" ang magkontra sa qualifying meet alang sa National Scuaa Meet.
"The regionals will serve as selection for the region's delegation to the nationals on February 19 to 24 at Batangas State University," pahayag niya.
Ang mga events nga tigian mao ang athletics, arnis, basketball, badminton, beach volleyball, chess, karatedo, baseball, softball, swimming, volleyball, dance sports ug sepak takraw.
Samtang ang Usep A ug B teams dunay kinatibuk-ang 336 atleta alang sa Mati sportsfest.
Gawas sa Usep ug DOSCST, ang Davao Norte State College, Compostela Valley State College ug Southern Philippines Agri-Business ug Marine and Aquatic School of Technology lakip sab.
Ang University of the Philippines (UP) Mindanao, migawas nga di makaapil sa sportsfest.
Ang maong regional meet gi-organisa sa Philippine Association of State Universities ug Colleges (Pasuc) 11 president Dr. Jonathan Bayogan sa DNSC. (MLSA)