TALIWALA sa nagkakusog nga kampanya batok sa gidili nga druga ug kriminalidad dili malikayan nga anaay mapagan.
Gani liboan na ang nangamatay ug liboan sab ang anaa karon sa prisohan. Mas daghan pa ang nisurender ug anaa sa listahan sa Philippine National Police (PNP).
Kadaghanan kanila niangkon nga tiggamit sa gidili nga druga ug gusto nang magbag-o. Ang nakaapan lang kay kulang ang pasilidad sa gobyerno nga i-rehab silang tanan o mahatagan og tukmang tabang.
Mao nga ang uban di na mo-report pagbalik ug mabalitaan na lang nato nga nabugha na kay nibalik daw sa pagpayuhot og druga. In short, BSDU- "balik sa dating ugali."
Usa kini sa hiwi nga kinaiya sa Pinoy nga maayo ra sa una apan walay lahutay. "Ningas cogon" sa Tagalog ug maayo ra sa istorya apan walay lihok sama sa daghan natong lider sa gobyerno sa wa pa moabot si PRody.
Busa gipahimangnoan ni PRody ang mga adik ug tigpayuhot og druga gikan sa pinakaubos nga opisyal sa barangay nga mao ang kagawad hangtud sa mga senador nga magbag-o na sa kaugalingon kay tumoy pa sa bulkan ang nasaksihan sa katawhan karon.
Mag iwas-BSDU ang naa sa listahan tungod kay taralon sila sa PNP ug Armed Forces of the Philippines (AFP) hangtud mahuman ang iyang termino sa 2022.
Tiaw mong baga kaayo ang libro sa listahan sa adik nga anaa karon sa kamot ni PRody.
Mao kini ang iyang rason nganong di niya matuman ang iyang saad nga mawagtang ang druga sa nasud sud sa unang unom ka bulan sa iyang paglingkod.
Matud pa niya nga isip ordinaryong mayor sa Davao kaniadto, wala siyay kapasidad nga masayran nga kadako sa problema sa druga sa nasud.
Busa sa iyang pangampamya sa 2016 elections, iyang gisaad nga masulbad niya ang maong problema sa pipila lamang ka bulan kung modaug na unya.
Mora'g nagpakita'g kamahay ang presidente nga nidagan pa siya tungod niining kadako sa iyang problema nga iyang gipas-an sa iyang abaga.
Mao nga gipadali na niya ang pag-usab sa sistema sa nasud ngadto sa Pederalismo aron mo-goodbye Malacanang na siya.
Busa panawagan sa Nota bene nga dili mag-BSDU ang anaa sa listahan ug hingpit na silang magpailalom sa rehab nga gihanyag sa mga ahensiya sa gobyerno, pribadong grupo ug simbahan sama sa "Sagop Kinabuhi Program" sa Archdiocese of Davao.
Apil sa motabang sa pag-rehab sa gitawag nga mga "reformist" kay ang "Basta Ikaw Lord" (BIL) nga may 10,000 kapin ka miyembro nga gipasiugdahan sa Jesuit community.
Plano sa anti-drug council sa Davao nga ipailalom og "spiritual renewal" nga mga puwede pang maayo pinaagi sa pag-apil nila sa 3-ka adlaw nga Days with the Lord Session.
Adunay lectures ug mga buhaton ang partisipante nga espirituhanon sud niining 3 ka adlaw nga igo nang makapahigmata kanila sa dakong gugma sa Diyos kanila nga may kabilinggan sa kinabuhi sa pamasin nga dili na sila mag-BSDU.
Mosulod lamang ang BIL human nga makaagi na ang mga reformist sa lain-lain pang ang-ang sa intervention sama sa medikal, pagbansay, tabang sa ilang panginabuhian, edukasyon ug uban pa.
Busa mga bro ug sis, iwas BSDU na!