KUNG nahigugma ka sa usa ka butang ug nahimo mo kining talento, dayag nga kini ang modala kanimo ngadto sa kalampusan.

Karong adlawa, laing indibiduwal na sab atong saludohan diha sa iyang gugma sa trabaho nga maoy nagdala kaniya sa daghang mga kadaugan.

Siya si Michel Paul Lodonia, 27-anyos, taga Piapi Boulevard sa Davao City, graduwado sa kursong Bachelor of Science in Hotel and Restaurant Management (BSHRM) sa Holy Cross of Davao College (HCDC).

"Artistic baya sab ang mga HRM grad, pero ang naa gyud sa akong kasingkasing ang fine arts," saysay sa atong bida kinsa ikatulo sa upat nilang magsuon nga nabuhi sa magtiayong Ofelia ug Ricardo Sr. nga pulos self-employed.

Bisan pa man sa iyang mga ulahing katuigan sa kolehiyo, giila na siya isip "Designer of the Year" gumikan sa iyang mga extra-ordinaryo nga mga obra, ma-body painting man kini, ma-papel ug bisan sa mga costume.

Gani sa pagpamatuod niini, ang iyang obra nahimong champion sa bag-ohay lamang nga Torotot Festival 2016 sa Davao City.

Di lamang kini apan daghan na siya'g mga obra nga midaug sa mga nanglabay'ng katuigan diha sa mga nagkadaiyang okasyon sama sa Halloween costume contest.

Apan unsa kaha'y iyang sekreto sa iyang daghang kalampusan nga nakab-ot?

"Ang sekreto nako, ang pag-love lang gyud sa work nimo, kinahanglan, happy ka sa imong ginahimo, ug huna-hunaon nga malipay ang mitan-aw sa imong mga obra ug satisfied ang imong customer," butyag sa atong bida kinsa duna say pinasaheng talento isip usa ka beautician.

Gawas sa mga body painting ug mga costume contest, hawod sa siyang mo-make up sa mga nagkadaiyang okasyon sama sa kasal.

Giingon sab niya nga di malikayan nga dunay mga mainggit sa iyang mga ginahimo, apan alang niya, sila na hinuon ang usa sa iyang mga nahimong inspirasyon nga paninduton pa ang iyang ginahimo aron mapakita kanila nga bisan sa mga pagtamay nahimo niya ang butang nga wa damha sa uban.

"Di gyud malikayan nga naay mainggit, pero okay ra na nako kay kanya-kanya man mi og kinabuhi, go lang sa life, basta ang Diyos nakabalo sa akong batasan ug sa akong mga ginahimo," mapaubsanon nga pagsaysay sa atong bida.

Si Flordelita Lodonia, ang ilang kamaguwangan nga graduwado sab sa kursong HRM, kinsa balik-balik na sa gawas sa nasud sa iyang pagsakay og mga international cruise ships, mipasalig kaniya nga tukuran siya og botique sa moabotay nga panahon.

Kini nga butang ang mas labing nakapadasig sa atong bida aron iyang mas mapakita pa ang resulta sa iyang gugma sa iyang trabaho nga bunga sa mahigugmaon ug mamugnaong hunahuna.

"Creative lang gyud kaayo ko, ug gihatagan gyud nako'g pagtagad ug gugma ang akong ginahimo, gugma lang gyud ang kinahanglan. Ug alang sa mga aspirant nga na-inlove sab sa sama niini nga trabaho, ipadayon lang ang gi-aim nga butang, isipon lang gyud nga kung naa ang love sa imong work, mahuman nimo kini, ug maayo ang resulta." dugang niya.

HRM sab ang natapos s iyang igsuon nga si Ricardo kinsa tua sab sa abroad, samtang ang ilang kamanghuran nga si Kenny usa na ka pulis kinsa mipailawom pa sa Regional Training School sa Police Regional Office (PRO) 11.

Gipamatud-an lamang sa atong bida nga kung duna kay maayong tinguha, buhata kini sa kinasingkasing, di ingon ug alang sa kuwarta, kon di ingon og alang sa ikalipay sa uban.

Kanimo, Michel Paul Lodonia, saludo kami kanimo!