ANG Mactan Electric Company (MECO) mopatuman og rotational brownout sa tibuok dakbayan sa Lapu-Lapu ug Cordova, lakip na ang isla sa Olango human sa sunog kahima­nan sa Korean Power Co. (Kepco-SPC).

Gipahibawo ni Meco general manager Gilbert Pagobo nga 40 porsento sa tinubdan sa ilang supply ang Kepco-SPC.

Ang nahibilin nga 60 porsiyento gi­­kan sa nagkadaiyang power supplier.

Nasayran nga moabot og 28 megawatts nga kuryente ang gi-supply sa Meco ngadto sa tibuok Mactan island, lakip na sa Cordova.

Matod pa ni Pagobo nga ang Cebu Energy Development Corporation (CEDC) nga usa sa power supplier sa Meco giingong nibalibad nga kadugangan ang ilang pag-supply sa elektrisidad.

Nidangop usab ang Meco ngadto sa wholesale electricity stock market panghinaot nga kadugangan ang kakuwang sa power suppy. 

Apan wa pay kasigurohan kon kahatagan ang Meco sa ilang gihangyo.

Kagahapong adlawa, nipakatap na og notisya ang Meco nga mopatuman sila og usa ngadto sa duha ka oras nga rotational brownout sa nagkadaiyang barangay sa Lapu-Lapu ug Cordova.

Samtang dako og gikatabang ang Interruptible Load Program (ILP) aron makunhoran ang brownout sa franchise area sa Visayan Electric Company (Veco) bisan kon kuwang og 53.8 megawatts ang ilang suplay.

Apan ang Veco padayon nga niapelar sa ilang mga konsumidor pagdaginot sa kuryente pinaagi sa pag-ibot sa appliances nga wa gigamit sama sa air conditioner, plantsa, refrigerator ug daghan pa nga maoy ilang gikampanya sa Cebu Unplugged.