ORMOC CITY, Leyte - Usa sa mga testigo batok sa mga gituhoang protektor sa Espinosa drug trade ang gipusil patay samtang duha ka sakop ni Kerwin nadakpan sa hiniusang pwersa sa kapulisan sa miaging adlaw.

Giila ang gipusil nga si Ferdinand Rondina alyas Dinan, 39, dunay kapuyo ug taga District 4 ning syudad.

Blangko pa ang kapulisan kun kinsa ang responsable sa pagpatay.

Base sa imbestigasyon sa kapulisan, alas 7:30 sa gabii, naglingkod samtang nagtan-aw og telebisyon si Rondina gawas sa ilang balay sa dihang miabot ang duha ka mamumuno.

Wa makabantay si Rondina ug mga kabanay niini gumikan kay tutok kaayo sa telebisyon.

Gipusil sa makadaghang higayon ang biktima ug nahagba, gitiwasan kini pagpusil aron pagseguro nga di na kini mabuhi.

Dali nga gidala sa iyang mga kabanay sa tambalanan si Rondina sa pamasin nga masalbar apan gideklarar kini nga patay na.

Ang kapulisan sa Police Station 1 miresponde sa insidente human mitaho si Kagawad Rolando Juntilla.

Narekober gikan sa crime scene ang 10 ka basiyo sa kalibre .45 ug tulo ka slug niini.

Human sa hitabo dali nga misibat sa wa matino nga direksyon ang duha ka responsable nga nag-bonnet ug nag-jacket og itom.

Padayon nga giimbestigar sa kapulisan ang motibo sa krimen.

Si Rondina mitahan sa kapulisan sa Ormoc ug ni Mayor Ri­chard Gomez atol sa paglusad sa Oplan Tokhang.

Mitahan usab si Rondina kang kanhi Albuera ug karon Ozamiz City Police chief Jovie Espenido human nganli ni anhing Albuera Leyte Mayor Rolando Espinosa Sr. nga kauban sa iyang anak nga si Kerwin.

Si Rondina miluwat og affidavit nga magtudlo sa mga gituhoang protektor sa drug trade ni Kerwin.

Samtang ang mga giilang sakop ni Kerwin Espinosa nga gisikop sa kapulisan mao sila si Jesus ‘Loloy’ Tolin, 34, panday ug nagpuyo sa Barangay Mabini ning dakbayan ug Brian Anthony ‘Tonypit’ Zaldivar, 46, taga Albuera, Leyte.

Base sa report sa kapulisan, ang duha ka suspek dunay warrant of arrest sa kasong murder nga giluwatan ni Baybay City RTC branch 14 Judge Carlos Arguelles.

Pinasikad sa warrant, gilusad sa kapulisan sa Leyte Provincial Police Office (LPPO), Provincial Intelligence Branch (PIB), Provincial Anti-Illegal Drugs Special O­perations Task Group (PAIDSOTG) ug Ormoc City Public Safety Company (CPSC) ang ope­rasyon.

Alas 7:30 sa buntag, nadakpan si Tolin sa iyang pinuy-anan sa Mabini diin nakuhaan kinig usa ka kalibre .45 nga pistola, usa ka magazine ug 9 ka buhing bala.

Tunga sa oras ang nakalabay gikan pagsikop kang Tolin, nasikop usab si Zaldivar sa gipuy-an niini sa Barangay Luna ning dakbayan.

Base sa warrant, way piyansa nga girekomendar ang korte batok sa duha.

Gibalhog ang duha sa Albuera Police Station gumikan kay sa Baybay City ang ilang kaso.

Ang Albuera ubos sa hurisdiksyon sa korte sa Baybay City.

Si Tolin ug Zaldivar ginganlan ni anhing Albuera Leyte Mayor Rolando Espinosa Sr. nga kauban sa iyang anak nga si Kerwin.