Laing railway company makigkita ni Luigi

GIKATAKDANG hima­maton ni Mandaue City Mayor Luigi Quisum­bing ang ikatulong railway company nga nipadayag og interes sa pagtukod og mass transit system sa dak­bayan karong umaabot Huwebes.

Kini maoy gipaambit ni Quisumbing sa dihang nahinabi sa mga tigbalita ning bag-o lang.

Sa wa pa magpasko sa milabayng buwan, nakig­himamat na ni Quisumbing ang duha ka mga dagkong railway company nga nagbase sa nasod sa China.

Usa niini ang China Railways ug laing kompanya nagdumili una sa pagpangalan.

“Possible options. Everything from initial designs to how much would it cost. This like efficiency and possible locations,” matod ni Quisumbing sa dihang gipangutana unsa ang unod sa diskusyon sa iyang pakighimamat sa unang duha ka railway company.

“It’s still in very rough terms but what I told them was that if they have any questions, if they need any assistance from our planning and engineering department, that the city of Mandaue will be more than willing to work with them,” dugang sa mayor.

Gitataw ni Quisum­bing nga ilang prayoridad nga proyekto sa dakbayan mao ang paghimo og mass transit sa Mandaue aron kataba­ngan niini ang kahimtang sa nagkagrabeng kahuot sa trapiko.

Giangkon hinuon sa mayor nga ang tahas di sayon nga mahimo da­yon sa dakbayan.

“Certainly, we cannot take it our own giving the cost involved pero this is something that the city of Mandaue is very interested in doing via Public-Private Partnership (PPP). Because traffic is really our big challenge for the next few year,” padayag ni Quisumbing.

Saysay niya nga sa kadaghang sakyanan nga mag-agian sa Mandaue matag adlaw, wa siyay nakitang paspas nga solusyon sa problema sa trapik hangtod nga makahimo ang Mandaue og mass transit nga iyang gihulagway nga “mas luwas, komportable ug economical” alang sa tanan.

Sumala ni Quisum­bing nga bisan palapdan pa og tag usa ka metro ang matag lane sa highway, magpabilin gihapon ang kahuot sa trapiko ilabi na kon ablihan o matukod na ang international port sa lungsod sa Consolacion.

Matod ni Quisum­bing nga ang ikatulong kompanya nga iyang himamaton karong Huwebes nagtrabaho sa railway system sa Western Europe ug maayo ang background sa kompanya sama sa iyang nahima­mat niadtong Disyembre nga China-based nga kompanya.

Iyang gihulagway nga mga moderno ang mga nahimong produkto sa tulo ka kompanya. Gani, pipila sa mga train nga nahimo sa mga kompanya iya na nga nasakyan niadto.

“We just have to look for the best option in Mandaue. Hopefully, they’re interested in partnering with PPP,” pada­yag ni Quisumbing.