Way biyahe sa barko
NIABOT sa kapin 2,200 ka mga pasahero ang stranded human kanselado ang mga biyahe sa mga barko sa pantalan sa Sugbo subay sa bagyong Auring.
Alas 2:00 sa hapon kagahapon, dihang niabot na sa 2,260 ka mga pasahero ang stranded human wa na tugoti sa Cebu Coast Guard nga mobiyahe ang mga barko sa pantalan gawas sa Sugbo.
Matod ni Cebu Coast Guard Commander Dionilett Ampil nga niabot na sa 64 ka passenger vessels ang wa mobiyahe, 51 usab ka rolling cargos ug 17 motorbancas ang gidid-an paglawig.
Dugang ni Ampil nga on-standby na ang ilang special operation unit ug ang Coast Guard Stations sa mga pantalan.
Andam usab ang ilang search and rescure aluminum boat kon gikinahanglan kini.
Tambag niini sa mga pasahero nga mamahimong motawag sa ilang hotline sa 416-6208 aron mangayo og impormasyon kon kanselado o nahibalik na ang biyahe sa mga barko.
Temporaryo usab nga gisuspenso ang biyahe sa mga bus sa probinsiya sa Sugbo nga mosakay sa Roro.
Matod sa Land Transportation Franchising and Regulatory Board (LTFRB) 7 nga way biyahe sa bus paingon sa Liloan sa lungsod sa Santander, Toledo City, lungsod sa Tabuelan ug Hagnaya sa dakbayan sa Bogo sukad kagahapon.
Kini nga mga biyahe mao ang mosakay sa Roro paingon sa Ormoc, Leyte, Bohol, Siquijor ug Negros Oriental.
Mamahimong makig-coordinate ang bus operators nga apektado ngadto sa LTFRB ug sa Philippine Ports Authority kon kanus-a kini pwede makabalik og biyahe.