GISURPRESA ni Ra­fael Pescos ang kadaghanan sa iyang paghari sa men’s 42-K event samtang nakalabni so Jennylyn Nobleza sa Bacolod City og back-to-back titles sa women’s 42-K sa 10th Cebu Marathon kagahapon sa Cebu Business Park.

Si Pescos sa Specrtum Runners Club migukod sa kasamtangang Milo Marathon king nga si Jeson Agravante sa Silay City aron iposte ang labing una niyang kalampusan sa lumba.

Ang 22 anyos nga si Pescos mihuman sa lumba sulod sa duha ka mga oras, 38 ka mga minutos ug 14 ka mga segundos nga maoy bag-o niyang personal best.

Nagsunod si Agravante pinaagi sa oras nga 2:39:40 samtang ikatulo si Maclin Sadia dala ang oras nga 2:39:42.

Nag-apas si Pescos nila ni Agravante ug Sadia hapit sa kinatibuk-ang lumba.

Nakuha lang ni Pescos ang liderato sa nahabiling kapin sa lima ka mga kilometros.

Sa interbyu sa Sun.Star Cebu, igsuong buhatan ning mantalaan, gipasabot ni Pescos nga nagreserba lang siya og hangin una siya mihunat sa hinapos nga bahin.

Sa iyang bahin, nadepensaan ni Nobleza ang iyang women’s 42K title pinaagi sa iras nga 3:18:46.

Si Lizane Abella sa Cebu maoy miangkon sa ikaduhang luna pinaagi sa oras nga 3:45:44 samtang ikatulo si maratho­ner Sandra Soliano sa oras nga 3:47:23.

Sa foreign category, ang Kenyan nga si Eric Chepsiror ug Susan Chepkwony mao ang ningpatigbabaw sa men’s ug women’s divisions.

Si Chepsiror mioras og 2:34:26 samtang si Chepkwony mioras og 3:33:39.

Miposte sab og back-to-back title si Cebuano elite runner Prince Joey Lee sa men’s 21K category sa oras nga 1:15:42.

Si Ruffa Sorongon maoy midaog sa women’s 21K pinaagi sa oras nga 1:35:56.

Ang mga ningpatigbabaw sa 10K mao sila si Ariel Saballa (35:11) sa men’s ug Cherry Andrin sa women’s Cherry (48:00).

Samtang ang mga mingdaog sa 5K mao sila si Earl Pionela (17:19) sa men’s ug Mary Joy Loberanis (19:54) sa women’s event.