GITADYAK sa San Antonio Spurs ang Charlotte Hornets agi sa 102-85 nga kadaogan atol sa 2016-17 NBA regular season niadtong Dominggo, Enero 8, didto sa AT&T Center, home sa Spurs.

Nibira og 19 puntos si Kawhi Leonard, samtang nitala og double-double sila LaMarcus Aldridge ug Dewayne Dedmon.

Niposti og 15 puntos ug 11 ka rebounds si Aldridge, samtang nihatag si Dedmon og 15 sab ka puntos ug 10 ka rebounds.

Nag-abot ang duha ka teams og hingpit nga dula apan kalit lang nakulaps ang Hornets sa kapin tulo ka minutos nabilin sa ika-tulo nga kwarter.

Gikan sa 60-60, nibinat ang Spurs og 11-2 run aron hinay-hinay modistansya batok sa Hornets.

Gisamotan pa sa Spurs pag-inat sa ilang kinataas nga labaw nga 22 puntos sa 2:57 minutos nabilin sa kataposang kwarter ug wala na maapsi sa Hornets paingon sa kadaogan.

Pabiling hingpit nagsunod ang Spurs karon sa nag-una nga Golden State Warriors sa western conference.

Ang Warriors adunay 31-6 win-loss record, samtang ang Spurs naa sa ikaduha nga anaay 29-7.