DAW gituslo karon sa ininit tubig si Commission on Elections (Comelec) Chairman Andres Bautista human siya gikasuhan sa National Privacy Commission (NPC) labot sa alegasyong pagpasagad niini human nasudlan og hacker ang voter database sa Comelec niadtong Marso sa nakalabay nga tuig.
Ang Palasyo sa Malakanyang sa maong isyu nagbutyag nga kinahanglan di palabyon ang maong hitabo ug patubagon ang Comelec labot sa “Comeleak” sa nakalabay nga 2016 Presidential elections.
Giingon sa Malakanyang nga kini ang pinakadautan nga nahitabo ug ang kapakyasan sa paghimo sa ilang obligasyon sa Comelec ug ang pagsupak sa government-controlled database, hinungdan nga di gayud kini palabyon.
Ang nahitabo, wala na gikatingala sa katawhang Pilipino gumikan kung eleksyon na gani sa nasud ang hisgutan, mohungaw gayud ang isyu human sa piliay gumikan sa pipila ka politiko nga di buot mapildi.
Sa isyu sa Comeleak, nahimo untang responsable ang Comelec ug tubagon ang pagkawat sa milyon nga data nga posibleng magamit sa identity theft ug fraud sa mosunod pa nga mga eleksyon.
Mopagawas sab unta dayon ang Comelec og resulta sa ilang imbestigasyon kon duna may mga tawo nga kakunsabo sa maong data leak aron mapabilin ang kredibilidad sa komisyon ug maampingan pa ang integridad sa electoral process, apan hilom pa man sila karon sa tirana.