Mga duwa karon:

(Mall of Asia Arena, Pasay City)

4:15 p.m. – Alaska vs.    Nlex

7:00 p.m. – Meralco vs.  Talk ‘N Text

ANG pagpakigsawo sa liderato maoy tumong ug tuyo sa Alaska Aces karong hapon pinaagi sa pagpukan sa naghingutas nga Nlex Road Warriors samtang mag-abot usab ang sister teams Talk ‘N Text Tropang Texters ug Meralco Bolts sa paghibalik sa 40th PBA Governor’s Cup elimination round sa Mall of Asia Arena sa Pasay City.

Kompiyansa si coach Alex Compton nga molampos ang iyang mga batos batok sa Road Warriors sa panagsangka nga sugdan sa alas 4:15 sa kahaponon.

Suwayan usab sa Talk ‘N Text ang pagpasaka sa ilang standing ngadto sa ikaupat nga puwesto batok sa Meralco sa alas 7 sa gabii nga main match.

Ang positibong pangagpas ni Compton nagagumikan sa ilang pagpukan sa lig-on nga Purefoods Star Hotshots, 92-86, sa niaging Mayo 27 aron palig-unon ang ilang paghupot sa ikaduhang puwesto. 4-1, hugot nga nagsunod sa solo leader Barako Bull, 5-1.

Gidayeg ni Compton ang iyang mga batos sa dihang midahang dali kining nakabawi gikan sa ilang masakit nga kapildihan, 103-104, batok sa Texters niadtong Mayo 18.

Sama sa gihapon, mosalit sya sa iyang import nga si Romeo Travis, kinsa nangulo sa Alaska nga may 25.6 points ug 13 ka rebounds matag duwa.

Gawas kang Travis ang Alaska charges naglakip usab nila ni Sonny Thoss, JV Casio, Calvin Abueva, Dondon Hontiveros, Vic Manuel ug Cyrus Baguio.

Ang Road Warriors ni coach Boyet Fernandez manikaysikay usab nga mahaw-as gikan sa iwit nga puwesto diin ilang gikauban ang Rain or Shine sa 1-4 nga baraha.