GRABE man tuod ka inilog ang Pilipinas apan si head coach Tab Baldwin dili gustong molugak bisan gamay nga ikauwaw sa Gilas cadets sa kampanya niini sa Southeast Asian Games basketball event sa Singapore.
Sulod sa 12 ka mga higayon, 11 ka mga titulo ang nahakot sa Gilas ning maong kompetisyon.
Ang gikahadlukang puwersa sa Pilipinas sa basketball sa Southeast Asian region ningpatigbabaw sa 11th Southeast Asian Basketball Association (Seaba) Championship pinaagi sa average nga 68.4 points winning margin.
Apan alang kang Baldwin, dili sila angayang mokompiyansa bisan gamay sa SEA Games.
“It only takes a very poor performance on our part, and the opponent having a great game. Then, all of a sudden, you’re embarrassed,” asoy ni Baldwin sa interbyu sa Sports Radio 918.
Ang Gilas mosugod sa ilang kampanya sa men’s basketball competition karong Hunyo 10 batok sa Indonesia sa Group A. Sa ilang grupo, ikaharong sab sa Gilas ang Malaysia ug Timor Leste diin ang top two teams mao ang moabante sa semi-finals.
Gikonsiderar ni Baldwin nga labing lig-ong ikaparang sa Gilas cadets mao ang Malaysia, Singapore, ug Indonesia.
“Malaysia and Singapore, those two teams probably represent the upper tier along with us. Depending on how they will strengthen their roster, Indonesia could also lift be at their level,” pasabot ni Baldwin.
Ang mga sakop sa Gilas cadets mao sila si Baser Amer, Prince Rivero, Kiefer Ravena, Scottie Thompson, Mac Belo, Troy Rosario, Jiovani Jalalon, Almond Vosotros, Norbert Torres, Kevin Ferrer, Glenn Khobuntin ug naturalized player Marcus Douthit.