Dear Noy Kulas,

Tawga lang ko og Liben. Dugay na kong nagsunod aning imong column bisan adtong didto pa ko sa abroad. Yes, nipahuway ko og duha ka tuig sa pagsige og balikbalik sa abroad tungod sa di maayo nga hitabo sa akong pamilya. Naigo ko sa kanta nga nagsaysay sa kaagi sa usa ka OFW nga pag-uli niya sa ilaha, ang ilang anak naduga­ngan na og usa.

Tungod sa hitabo, nagbuwag mi sa akong asawa ug na-custody nako ang among duha ka anak samtang sila sa iyang lalake nagtipon na. Ang ilang anak toa nila. Maayo gani kay nawarningan ko sa akong pamilya ug pamilya sa akong asawa, nakaandam ko sa akong kaugalingon. Giundangan nako ang pagpadala niya mao nakatigom ko og igo-igo sa negusyo.

Dinhi, akong naila-ila si Letlet nga 25 years old pa samtang ako 40. Medyo taastaas ang among age gap, Noy. Ingon niya gusto na siyang magminyo sa di pa siya mag 27. Wa koy problema sa iyang pamilya kay nakahibawo sila sa akong estorya, but kining age gap maoy akong nabalak-an. Ikaduha, mahimo ba ming magminyo nga kasado man mi sa akong asawa? Mahimo ba kong mo-file og annulment? Unsa ka dako sa gasto?

LIBEN

Lib,

Uso na ron ning tag-as og age gap nga makarelasyon. Pero mao lagi, moduwa gihapon sa relasyon ang age gap kay ang matag henerasyon dunay iya-iyang mga kasinatian. Apan kon mag-ilhanay og maayo ang usag usa ug maghimo og mga adjustment, di kini mahimong problema. Di mag-iyahay og impose sa usag usa nga gusto hangtod nga magkaaway na hinuon. Magrespetuhay ang duha. Naa pa moy mga 2 years nga mag-ilhanay og maayo.

Dangop sa abogado aron maka konsulta ka kabahin sa imong sitwasyon. Mahimo tingali kang maka-file og annulment batok sa imong asawa nga nakigpuyo na og laing lalake. Apan mas maayo nga ang abogado maoy imong konsultahon niana kon ang iyang pagbiya matawag ba og psychological incapa­city isip asawa.

Dako ang gastuhon sa annulment kay mobayad ka og abogado ug psychologist nga maoy mosusi kon psychologically incapacitated ba ang partner nga maoy natumngan sa petisyon. Six figures ang imong magasto. Mao bitaw nga ang mga minyo nga nagkabuwag, kutob na sa puyo-puyo tungod sa kadako sa gasto ug kahadol sa proseso. Kon nahigugma ka niya, andami ni og kwarta aron masulbad imong problema.

NOY KULAS

(Alang sa imong problema, e-mail sa kulassuper@sunstar.com.ph)