ANDAM motabang si Melmark Dignos ni International Boxing Federation (IBF) superflyweight champion Jerwin Ancajas kinsa sa unang higayon modepensa sa iyang titulo karong Enero 29 didto sa Studio City Casino sa Macau.

Ang 21-anyos nga ubos sa Rex Wakee Salud gym milupad na paingo sa Manila sa niaging semana aron motimang sa ensayo ni Ancajas.

“Atoa na siya sa Manila. Siya ang sparring partner ni Ancajas. Dako ni niyang oportunidad nga makahashas usab siya sa iyang talent pinaagi sa pagpakig-sparring og world champion,” matod ni Brix Flores kinsa maoy trainer ni Dignos.

Si Ancajas modepensa sa iyang titulo batok ni kanhi interim World Boxing Associaiton (WBA) champion Jose Alfredo Rodriguez.

Iyang nalangkat ang kampyonato sa miaging tuig.

Sa nasayran, nga ang laing Pinoy fighter nga si Johnriel Casimero gusto usab nga makigsangka ni Ancajas alang sa world title fight.

Si Casimero, kanhi two-time world champion, sa flyweight division, apan ning uwahi lang misaka sa iyang timbang diin sa samang higayon mibuhi usab sa iyang titulo.

Si Sammy Gelloani, ang handler ni Casimero, mipasabot nga posibling dili gyud kalikayan nga magkaaway gyud ang duha ilabi na kon mahimong mandatory challenger ang iyang batos.