USA ka lalakeng binilanggo naghikog sulod sa pansayan sa prisohan sa Pinamungajan Police Station niadtong Dominggo alas 11:00 sa gabii.

Ang patay nang nakaplagan sa iyang kauban giilang si Maximino Gabihan Buenaflor, 48, taga Barangay Binabag, Pinamungajan, Sugbo.

Siya napalgan sa iyang kauban piniriso alas 12:00 sa gabii nga naglingkod sulod sa pansayan nga wala nay kinabuhi.

Aduna siyay higot nga pisi sa liog nga gihigot sab sa rehas nga bintana sa pansayan.

Gibutyag ni PO1 Nathaniel Mansueto sa Pinamungajan Police nga si Buenaflor, sa wala pa ang hitabo, kanunay maghinuktok mahitungod sa problema niini sa iyang pamilya.

Naguol siya nga wa na magduawan ang iyang live-in partner, pun-an pa sa kaso nga iyang giatubang sukad niadtong miaging Hul­yo 4, 2016 nga maoy hinungdan sa iyang pagkabilango.

Gibutyag sab ni Mansueto nga ang pisi nga gigamit hayan gikan sa hayhayan duol sa bentana sa prisohan.

Nagtuo sila nga dugay nang nagplano si Buenaflor nga maghi­kog tungod sa mga problema niini nga giatubang.

Wa hinuoy gitumbok nga sad-an ang kapulisan sa kamatayon niini.

Gisuwayan pa sa pagdala si Buenaflor sa Pinamungajan District Hospital, apan gidiklarar nang patay nang daan sa wa pa maabot.

Samtang usa ka giingong special child naghikog sa Barangay Sa­yaw, Barili, Sugbo niadtong Do­minggo sa alas 9 sa gabii.

Ang biktima giilang si Joseph Ronan Jacalan, 29,taga Barangay Sayaw.

Si Jacalan napalgan sa iyang ig-agaw nga si John Paul Themoteo nga nagbitay sa ilang terrace nga adunay higot nga nylon chord sa liog.

Gibutyag ni PO1 Gilbert Encabo sa Barili Police nga si Themeteo nisulti kanila nga sa wa pa ang hitabo, si Joseph kanunay magyaw-yaw, mag­kig-istorya sa iyang kaugalingon.

Apan nahibong siya sa dihang kalit lang nihilom ang iyang ig-agaw nga naa sa terrace.

Sa iyang pagsaka nakit-an nag si Joseph nga nagbitay nang patay na.

Wa pa matino sa kapulisan sa Barili Police ang rason sa paghikog. Mhike Dominique C. Fernandez ug Diana Grace G. Pila, USJ-R BA Interns