NGANONG giwagtang ni Mayor Tomas Osmeña ang Sinulog sa Kabataan sa dakbayan nga langkuban sa mga public elementary ug high school isip tipik sa kalihukan sa Sinulog Festival?

Inay iya kining gipulihan og Sinulog sa Barangay nga apilan sa mga mahiligon sa sayaw kinsa nagpuyo sa ilang mga lokalidad.

Si Osmeña nipasabot nga di siya gusto nga masakripisyo ang pagtuon sa mga estudyante gumikan sa pagsalmot sa eskwelahan sa Sinulog ug ang giingong pangabuso ngadto ginikanan.

“The school has been very abusive. They treat the children to practice during class hours, force the parents to contribute and I’m not in favor of that,” paghulagway ni Osmeña.

“Di ko ganahan nga moapil ang eskwelahan directly or indirectly… outside of that no problem,” dugang sa overall chairman sa Sinulog Foundation Incorporated.

Gibauran sa mayor ang mga barangay kinsa nisalmot ug mosalmot pa sa umaabot nga Sinulog sa Barangay nga di mogamit og mga estudyante sa ilang partisapasyon kay di siya magduha-duha sa pagpa-undang sa ilang pag-apil.

Samtang gipadayag ni Osmeña nga magpadayon ang Sinulog Festival sanglit nakauyon siya sa konsepto diin ang mga festival sa lainglaing lugar sa Visayas ug Mindanao mopadala sa ilang labing matahom nga kandidata.

Apan supak siya nga gastuhan sa Cebu City Government ang pagpahigayon sa Miss Cebu diin sa nakalabay nga administrasyon mao kini usa sa sentro sa kalihukan.

Gipadayag hinuon ni Osmeña nga di siya mosupak kon gastuhan sa private sector ang subling pagpahigayon sa Miss Cebu.

Matod sa mayor nga wa mahimuot ang kinabag-an sa pagpahigayon sa Miss Cebu ug ang nakapahimulos ra niini kadtong mga elitista ug mga suod sa mayor.