HULAGWAY sa mga terorista sa Mindanao ipakatap sa syudad ug lalawigan sa Sugbo aron kon moanhi sila, mailhan sila sa publiko ning nagsingabot nga Sinulog.
Ang maong mga terorista mga sakop sa Abu Sayyaf nga dunay pending warrant of arrestg gibutang sa mga paypay.
Giklaro hinuon ni Chief Supt. Noli Taliño nga way angay nga ikabalaka sa publiko sanglit luwas ang Sugbo sa bisan unsa nga hulga.
Human mapatay ang giilang leader sa Maute group sa Mindanao niadtong miaging semana, nagtuo ang kapulisan nga dunay himuon nga pagbawos ang grupo sa gobiyerno.
Ang Maute group maoy niangkon nga sila ang sakop sa teroristang grupong Islamic State of Iraq and Syria nga responsabli sa kidnapping ug bombing sa Mindanao sa nanglabay nga mga buwan.
Matod ni Taliño nga bisan wa sila makadawat og direktang hulga gikan sa teroristang grupo, wa sila mokompyansa sanglit mahimong target ang dagkong mga kalihukan sa nasud sa ilang pagpangatake sama sa Sinulog festival.
Lakip sa ilang ipang apod-apod sa mga bus terminal, pantalan ug mga pampublikong lugar ang mga Sinulog security tips aron masayod ang publiko unsay ilang angay nga buhaton.
Samtang isugyot sa PRO-7 ang pagpawong sa mga signal sa cell site atol sa Sinulog grand parade sama sa gihimo sa Camp Crame atol sa kapistahan sa itom nga Nazareno sa kaulohan kagahapon.
Giangkon sa ni Taliño nga dunay mga negosyo sa syudad sa Sugbo lakip na ang mga reporter sa radio nga mogamit sa ilang cellular phone sa pagbalita nga maapektuhan sa pagpawong sa signal sa cellular phones.
“Well, maapektohan sila definitely kasi lahat na. So, kunting sakripisyo lang, ito mag materialize ang concern naman natin dito ay security,” matod ni Taliño.
Subay ning tinguha sa kapulisan, nanghinaot ang Kapitolyo nga di maapektohan ang komunikasyon tali sa mga awtoridad ug sa mga tigpasiugda sa kalihukan kon wa nay signal sa cell phone.
Nagtuo si Gobernador Hilario Davide III nga gipangandaman sa mga awtoridad ang posibleng mga kakulian nga mahitabo atol sa dakong kalihukan.
Naglaum si Davide nga di kini makaapekto sa komunikasyon nga himuon sa mga awtoridad ug responders ingon man sa mga tigpasiugda sa kalihukan aron paspas ug mas epektibo nilang maaksiyonan ang mga posibleng kakulian sa maong adlaw.
Wa hinuon siya makadawat og report labot sa mga hulga.
Kompiyansa si Davide nga dunay giandam nga plan B ang kapulisan kon dunay mga kakulian sa seguridad nga mahitabo atol sa pista senyor.
Kapin sa 5,000 ka mga pulis ang ipakatap atol sa maong kalihukan.
Subli niyang giawhag ang publiko nga magmabinantayon ug tabangan ang mga awtoridad sa pagbantay niadtong mga tawo nga posibleng magmugna og kagubot atol sa Sinulog.