BAGYONG Auring nihinay ug nahimo na lang low pressure kagahapon sa buntag, matod sa Philippine Atmospheric Geophysical Astronomical Services Administration (Pagasa).

Apan bisan sa paghinay, way undang nga pagbunok sa uwan nasinati sa habagatang Sugbo nga nakamugna og baha.

“Na-downgraded si Au­ring into low pressure. Apan dunay mga pag uwan-u­wan especially sa south (Ce­bu). Remnants ni ni Auring,” matod ni Engr. Oscar Tabada, Pagasa-Visayas director.

Nipasabot sab si Tabada nga taliwala sa paghinay sa bagyo, duna gihapoy pag-uwan tungod gihapon sa northeast monsoon kun amihan.

Gibana-bana nga mobiya sa Philippine area of responsibility (PAR) si Auring sa Biyernes apan laing LPA nakit-an ug hayan mosulod sa susamang adlaw.

Matod pa ni Tabada nga sa higayon nga mamahimo kining bagyo, tawgon kini og Besing.

Apan base sa ilang nakita sa satellite weather data, dako ang kahigayunan nga di kini moigo sa yuta sa bisan unsang dapit sa nasod.

Samtang way bisan usa ka pasahero sa Hilton wharf, barangay Punta Engaño, Lapu-Lapu City ang nanimpalad nga mobiyahe paingon sa isla sa Olango ilabi na nga giga-id sa Cebu Coast Guard ang tanang matang sa sakayan sa kadagatan sa dihang gipa-ubos sa signal no. 1 ang Sugbo.

Si City Disaster Risk Reduction Management (CDRRM) officer Andy Be­ra­me nagkanayon nga ilang gipangandaman ang posibleng pagbaha sa pipila ka mga barangay sa Lapu-Lapu.

Ang siyudad adunay mga flood boats ug motor pump nga mosuyop sa baha nga magamit ni­ad­t­ong mga dapit nga gi­pang­lantawan nga lunopan.

Ang Dakbayan sa Man­daue wa usab mokom­pyansa.

Kagahapon sa buntag, nakigtagbo si Mayor Luigi Quisumbing sa City Di­saster Risk Reduction and Management Office (CDRRMO) aron kapangan­daman ang epekto sa bagyo. 

Atol sa meeting kagahapon, pabiling anaa sa red alert status ang mga bahaon nga barangay sa dakbayan. 

Giandam usab sa Man­daue ang mga sakyanan nga maoy mohakot sa mga pa­sahero nga posibleng ma-stranded tungod sa bagyo. 

“Voluntary evacuation will be offered to fire victims in Sitio Salvacion, Maguikay until 2pm,” ni Quisumbing ngadto sa mga residente nga apektado sa sunog nga miigo sa dapit niadtong Enero 1. 

Tunga sa adlaw

Samtang si Talisay City Mayor Eduardo Gullas nisuspenso sa trabaho sa Talisay City Hall kagahapon sa udto tungod sa bagyong Auring.

Gusto ni Gullas nga makapauli ang mga kawani ug maka-adam usab sila sa ilang tagsa-tagsa ka panimay tungod sa bagyo.

Gitigom ni Gullas ang iyang mga department head, kadagkuan sa tunghaan, kapulisan ug City Disaster Risk Reduction and Management Office ug kabomberohan.

Si Tabada maoy ilang gidapit aron mo-discuss labot sa bagyo.

Gibutyag ni Dr. Jomar Rubio, executive assistant ni Gullas, nga ilang gi­deklarar nga half day ang trabaho tungod kay nag­huna-huna usab ang ma­yor sa kaayuhan sa mga ka­­wani nga sila makaandam usab.