NAPUGNGAN sa Cleveland Cavaliers ang hulga sa Phoenix Suns sa kataposang kwarter aron modaog agi sa 120-116 atol sa 2016-17 NBA regular season niadtong Lunes, Enero 9, didto sa Taking Stick Resort Arena.
Nibira og 28 puntos ug walo ka rebounds si Lebron James, samtang nitala si Kevin Love og double-double agi sa 25 puntos ug 10 ka rebounds. Nihatag sab si Kyrie Irving og 27 puntos.
Nakabinat ang Cavaliers sa ilang kinataas nga labaw nga 22 puntos, 62-40, sa ika-duha nga kwarter bago nahuman ang unang half sa iskor 69-53.
Apan gibura tanan sa Suns human makabalik sila sa dula agi pagputol sa biya sa tulo ka puntos nalang pagsirado sa ikatulo nga kwarter.
Nasugpo sa Cavs ang hulga sa Suns sa kataposang kwarter agi pagkuha og igong labaw.
Igo lang nipaduol ang Suns sa upat ka puntos nga biya sa himatyanon nga segundos ug wala na nila maapsan.