LAAK, Comval Province - Usa ka miyembro sa Civilian Active Auxiliary (CAA) ang namatay samtang laing usa ang naospital human gipamusil sa hubog nga sundalo didto sa Purok 1, Barangay San Antonio sa maong lungsod, alas 2:10 sa kaadlawon, Sabado.
Ang namatay giila nga mao si Carlito Marangon, samtang ang samaran mao si Jenefer Bauya, parehong hamtong ang edad, nagpuyo sa Barangay San Antonio, Laak.
Gitudlong suspek si Staff Sergeant Tirso Quizzagan, 44, minyo, detachment commander, ubos sa 72nd Infantry (Gabay) Battalion, Philippine Army, nagpuyo sa Purok 5, Barangay Sto. Tomas, Loreto, Agusan del Sur.
Segun sa imbestigasyon sa Laak Municipal Police Station, alas 11:40 sa gabii niadtong Biyernes, hubog ang suspek nga gikan sa birthday party sa usa ka tindahan.
Pipila ka oras ang milabay, kalit nga gikompronta sa suspek ang iyang mga CAAs sa walay kapasikaran.
Gipukaw matod pa sa suspek ang mga CAA sulod sa detachment.
Kalit nga gipabuto sa suspek ang iyang M16 Armalite rifle hinungdan nga naigo ang mga biktima.
Si Marangon giingong nakaagom og pinusilan sa likod nga bahin sa lawas nga maoy hinungdan sa kamatayon niini, samtang si Bauya nasamdan sab sa dalunggan.
Paspas nga miigtad ang suspek ug mitahan ngadto kang Master Sergeant Antonio Cabotaje Jr., platoon leader sa Barangay Banbanon, Laak.
Narekober gikan sa crime scene ang 11 ka basiyo sa bala sa M16 Armalite rifle.
Ang patay'ng lawas sa biktima gihaya sa usa ka punerarya sa lungsod sa Laak samtang ang samaran nagpaalim sulod sa Davao Regional Medical Center sa Apokon, Tagum City.
Ang suspek gikustodiya sa buhatan sa kapolisan.
Nakig-alayon na ang Laak Municipal Police Station sa pamunoan sa 72nd Infantry (Gabay) Battalion aron kuhaon ang Armalite rifle nga gigamit sa suspek sanglit ipaubos kini sa ballistic examination. (Rockyben S. Catisay)