WALO ka armadong tawo lamang ang miatake sa North Cotabato District Jail (NCDJ) sa Barangay Amas, dakbayan sa Kidapawan niadtong miaging semana.

Kini mismo ang gikompirma ni Derby Nasser, alyas Kumander Derby, sakop sa Moro Islamic Liberation Front (MILF) Lost Command.

Matod ni Kumander Derby nga ilang gisulong ang North Cotabato District Jail gumikan gipaguba ni NCDJ Jail warden Peter Bungat ang mosque ug gihimo nga basurahan.

Gihimakak sab ni Kumander Derby ang pamahayag ni Superintendent Bungat nga 100 ka armadong rebelde ang miatake sa NCDJ.

Matod sa Kumander nga walo lang ug di 100.

Apan hugtanon sab nga gihimakak ni Superintendent Bungat nga duna siyay gipaguba nga mosque gumikan sa pag-abot niya sa NCDJ, walay mosque dinhi, gawas lamang sa mga kubol diin iya kining gipaguba gumikan gihimong drug den sa mga priso.

Ug nakita mismo sa mga jailguard nga nagbantay sa district jail ang kadaghan sa mga armado nga miatake sa prisohan.

Moabot na sa 58 ka priso ang nadakpan ug napatay samtang 46 niini nabalik sa NCDJ, napulo ang napatay ug duha ang naospital.

Gipalig-on pa sa hiniusang puwersa sa militar, kapolisan ug Bureau of Jail Management and Penology ang paglutos sa grupo ni Kumander Derby ug sa mga nahibiling priso nga mipuga. (Edgar E. Fuerzas)