MAAYONG balita. Kay ang gikahadlukang paglusad og   teroristang kalihukan sa  mga terorista atol sa adlaw sa Translacion sa Black Nazarene sa Manila, niadtong Lunes (Enero 9) wala mahitabo.

Apan gikinahanglang mag­­mabinantayon ang kataw­han  kay dako ang posibilidad nga himuon kini sa mga terorista sa insaktong  panahon ug tukmang oras.

Gani adunay kompirmasyon ang  Department of Interior and Local Government ( DILG) sa pagsud sa mga terorista sa Metro Manila mao nga adunay travel advisory   sa mga embahada sa mga nasud sa gawas nga di luwas ang miaging Traslacion.

Para nako ang kahugot sa siguridad sa palibot nga gihimo sa kapulisan, militar ug mga vo­lunteers  maoy rason nganong napakyas ang mga terorista sa ilang paglusad og kasamok.

Samtang dinhi sa Sugbo, tulo sab ka mga pilo ang pagpa­ngandam sa mga tinug­yanan sa balaod aron mahimong luwas ang katawhan sa posebling pagpahigayog ka­samok sa mga terorista sa umaabot nga Sinulog karong Dominggo (Enero 15).

Na-alarma sab ang Sugbo, nga mahitabo dinhi ang samang pagpamomba sa lungsod sa Hilongos, Leyte nga miresulta sa pagka-angol sa dul-an sa 15 ka mga tawo.

Ang mga kalihukan sama sa Sinulog ug Black Nazarene paboritong target sa mga terorista. Sa katarungan kabalaanan sa ilang espiritu kon maka patay og mga Kristyano.

Hinuon  kon ang pagtuo maoy pagahisgutan bisan paman ang kamatayon dili babag sa ilang pagsalmot sa kalihukan.

Apan ang dili Katolitiko, atol sa interview sa Agila, nakasaway sa duha ka mga dagkong kalihukan. Matod pa nila nakalimtan na sa kadaghanan ang pagsimba sa matuod ug buhi nga Diyos nga mao si Jesu Cristo.

Kay atoa na magsimba sa mga larawan nga gihimo sa tawo. Ilang gibasi sa bibliya ang paghingilin ni Kristo sa mga nagsimba og larawan. Pinaagi sa pag-ingon ni Kristo pahalayo kamo kanako (Kristo) inay inyong simbahon ang matood nga Diyos ug atoa na kamo magsimba sa mga Larawan nga hinimo sa tawo.

Apan ang tubag sab sa interview sa Agila sa duha ka sakop sa Katoliko  igo ra sa pag handum  kang Kristo ang pag ampo sa larawan ug di ang santos ang gihimong Ginuo. 

Balik sa yawan-ong buhat sa mga terorista, sila mohimo og suicide bombing, pagpamomba, pagpamusil ug pagpanunggab.

Ang terorista ilabi na ang Islamic State of Iraq and Syria (ISIS) maoy gikahadlukan sa gamhanang mga nasud sama sa Amerika ug Russia. Unsa na kita dinhi sa Pilipinas nga usa lang ka gamay nga nasud.

South Bus Terminal

Para nako angay sabton ang plano ni Goberandor Hilario Davide III sa pagbalhin sa Cebu South Bus Terminal (CSBT) ngadto sa South Road Property (SRP) nga gisuportaan usab ni Cebu City Mayor Tomas Osmeña.

Hinuon, di malikayan nga makadawat kini og pag­saway sa mga  pasahero ug motorista kay mabag-uhan sa ipatuman unyang kausaban . Apan sa madugay ug madali maanad ra unya ang mga mangreklamo.

Way lalis nga ang CSBT  nahimutang sa sentro sa siyudad nga  nakamugna og problema sa dagan sa trapiko. Dali raman alang kanila ang pag adto sa Colon , Fuente, Ayala business Park ug IT Park. 

Ug bintaha man sab unya sa mga motorista  kay ang kalamboan anaa na sa SRP. Kay sa sud ning tuiga, mobarog ang higanting taytayan nga magsumpay sa siyudad sa Sugbo ug lungsod sa Cordova.

Trump ug Russia

Sa yano  nakong pagsa­bot,  morag dunay kasayuran si American President elect Donald Trump sa nabulgar nga cyber hacking nga isyu nga binuhatan sa Russia.

Nakakuhag  ebidensya ang Criminal Intelligence Agency (CIA) sa gihimong hacking sa Russia sa email account ni Hi­lary Clinton sa panahon sa kampanya sa election sa Amerika.

Ang isyu usa sa nakaingon sa kapildihan ni Clinton ug nakatabang sa kadaugan ni Trump. Hinuon,  wa pay ebidensya may kalambigitan ba siTrump apan maoy binipisyaryo sa cyber hacking.

Sensitibo kaayo kining isyu kay makaapektar kini sa  ekonomiya ug siguridad ang gihimong cyber hacking sa Russia ug tataw kining kalapasan.

Kon nahimo sa Russia sa pinakagamhanang nasud sa kalibotan nga mao ang Amerika, kaluoy sa mga gagmay nga mga nasud kon ila ning buhaton.

Email: efren_lonzon@yahoo.com Text: 09427930111