Mga duwa karon:

(Araneta Coliseum)

4:15 pm. – Meralco vs Mahindra

7:00 pm. – Star vs. Alaska

MASIAK ang panagtabla tali sa Star Hotshots ug Alaska Aces karong gabii sa pagbalik sa aksyon sa PBA Philippine Cup sa Araneta Coliseum. Pulos dala ang 3-3 nga baraha, ang panagtakos sa duha sugdan sa alas siete sa gabii nga maoy main attraction sa double-header.

Apan sa dili pa ang maong panag-engkuwentro, ang panagtigi una sa pulos nangiwit nga mga koponan nga mao ang Meralco Bolts ug Mahindra Floodbusters ang modayandayan sa alas 4:15 sa kahaponon.

Ang Bolts nga maoy runner up sa miaging conference nagtangag og 2-7 nga baraha samtang ang Mahindra mirehistro lang og usa ka daog sulod sa unom ka duwa.

Bugtong kaduagan nga naangkon niini mao ang ilang pagpildi sa Blackwater Elite.

Ang Aces, sugod karon, moduwa nga wala ang ilang power-forward nga si Noy Baclao tungod sa angol niini sa tuhod.

Hinuon ilang hangupon ang pagbalik usab sa beteranong si Sonny Thoss kinsa bag-o lang sab nga makompleto ang pagpaalim niini sa iyang angol.

“We’ll see how the warmups go and try to play a little bit,” nagkanayon si Thoss. “It’s a little bit shaky, but it’s good to be back on the floor again.”

Giangkon ni Aces coach Alex Compton, nga dili pa 100 percent ang kondisyon sa 35 anyos nga bigman.

“Maybe a little bit (of playing time),” matod ni Compton. “We’ll have to see how he feels.”

“(But) Noy’s done for the conference,” dugang niya. “We’re certain of that.”

Sa laing bahin, naobserbahan nga nagpadayon gihapon ang dili haom nga dinuwaan sa Barangay Ginebra ning nagpadayon nga 2017 PBA Philippine Cup bisan pa man sa presensiya sa mga star player ug sa mga rookie stars.

Ang Ginebra, kampyon sa miaging conference, adunay tulo ka daog ug upat ka pildi, nga dakong sukwahi sa gituohan ug gipaabot sa mga PBA fans ug ilabi na sa mga dumadapig niini.

Ang uwahi nilang masakit nga kapakyasan mao ang ilang kapildihan sa sister-team San Miguel Beer, 72-70, diin aduna unta kini igong kahigayonan nga modaog sa himatyong segundos.

Apan sukwahi sa ilang nahimo sa niaging finals conference diin bisan pa man og nabiyaan sila sa himatyong mga segundos pero pinaagi sa ilang import nga si Justin Brownlee kinsa maoy mikayod ug ang tres niini nga dungan sa pagkapupos sa oras natumanan na gyud ang gihandom nga kampyonato nga wala nila makuha sulod sa pito na ka tuig.

Apan ning higayona, wala si Brownlee ug kinahanglan nga makamao silang moduwa sa crucial nga mga segundos nga di magsalig sa import.

Dili kini problema sa Ginebra tungod kay aduna kini mga dekalibreng magduduwa, apan hangtod karon naglibog pa si coach Tim Cone kon kinsa gyud sa iyang mga players ang adunay saktong liderato nga makagiya sa Ginebra ilabi na sa mga krusyal nga mga minutos.

Hinuon ang pagpakigkombati og hugot batok sa Beermen gikan sa sinugdanan hangtod sa katapusang gutlo sa duwa maoy positibong butang nga nakapakita sa Ginebra.