ORMOC CITY, Leyte - Gikonsiderar sa kapulisan sa Eastern Visayas nga dako ang ilang nakab-ot sa pagpatuman sa Project Double Barrel nga gilusad atol sa paglingkod ni Presidente Rodrigo Duterte.
Sa uwahing datos sa Police Regional Office (PRO) 8, mokabat sa 16, 935. 64 gramos sa ilegal nga drugas ang ilang nasakmit gikan Hulyo 1, 2016 hangtud Enero 5, 2017.
Ang kinatibuk-ang kantidad sa naasoyng timbang kay mokabat sa P135,515, 494. 52.
Sa mga provincial office, mas daghan ang nasakmit sa kapulisan sa Leyte Provincial Police Office (LPPO) diin sakop niini ang Albuera Leyte nga area of operation sa bigtime drug lord nga si Kerwin Espinosa.
Ang LPPO nakasakmit og 15, 491. 65 gramos nga mokabat sa balor P123, 957, 235; Eastern Samar Provincial Police Office P568, 134. 52; Samar Provincial Police Office P303, 043. 20; Northern Samar Provincial Police Office P270, 476. 60; Southern Leyte Provincial Police Office P235, 105. 00 ug Biliran Provincial Police Office sa kantidad nga P55, 669. 20.
Sa mga siyudad, mas daghan ang nasakmit sa Tacloban City Police Office nga mokabat sa 1160. 79 gramos ug dunay kantidad nga P9, 289, 367. 00.
Sa Ormoc City, dunay 104.5507 gramos nga dunay kinatibuk-ang kantidad nga P836, 464. 60.
Mokabat sa 144 ka armas ang nasakmit sa PRO8.
Base gihapon sa datos, mokabat sa 703 ka drug personalities ang nasikop sa Eastern Visayas, 69 niini ang user ug 634 ang pusher.
Samtang mokabat sa 47 ka pusher ang napatay sa police operation human misukol sa kapulisan.
Way user nga napatay sa Eastern Visayas.
Gipasigarbo sa PRO8 ang 90 porsiyento nga pagkaputol sa supply sa ilegal nga drugas sa rehiyon.