Mga badlungon gi-monitor sa kapulisan sa dakbayan

GI-MONITOR karon sa kapulisan sa dakbayan sa Sugbo ang mga kriminal nga gikan namiktima sa kapistahan sa itom nga Nazareno sa kaulohan nga posibling mobalhin dinhi sa siyudad tungod sa Sinulog.

Nabantayan nga ma­tag human sa kapistahan sa itom nga Nazareno sa kaulohan dako ang posibilidad nga ang mga badlungon mobalhin sa siyudad sa Sugbo tungod sa Sinulog karong Dominggo.

Tungod niini miman­do karon ang hepe sa Cebu City Police Office nga si P/SSupt. Joel Doria sa iyang mga intelligence personnel nga molusad ug monitoring kun kinsa kining grupo aron sa pantalan pa lang mapakgang na nila.

Hinuon duna nay mga hulagway ang CCPO sa mga notadong kawatan human ni masikop sa nang­labay nga Sinulog grand parade diin maoy ilang gamiton alang sa pagpangita sa mga suspek.

“Actually last year ganun din ang nangyari, after ng feast ng black Nazarene sa Manila may mga nahuling mga pick pocket mga mandurokot dito,” matod ni Doria.

Si P/CSupt. Noli Taliño, direktor sa kapulisan sa Central Visayas, nagkanayon nga matag adlaw ilang gitan-aw ang ilang pagpangandam sa seguridad ug kun kinahanglan nga palambuon ila kining buhaton.

Di sila makatugot nga mapakyas sila sa pagpatuman sa seguridad sa Sinulog nga usa sa mga dayohunon sa mga langyaw ug lokal nga turista.

“Tingnan natin lagi kung ano yung pwede nating iimprove, kung ano ang ating idag-dag o i-revise doon sa ating security plan,” matod ni Taliño.

Lakip sa ipasusi sa kapulisan ang mga lod­ging houses dinhi sa siyudad sa Sugbo nga maoy kasagaran nga sak-an sa mga kriminal.

Ang modus sa grupo mao ang salisi sud sa mga mahalong kan-anan, sud sa simbahan ug atol sa grand parade nga magduotduot na ang mga tawo.

Pahimangno nila sa publiko nga di na magdala og cellular phones sanglit mahimong di na magamit ang butang atol sa Sinulog kun masabutan nga “i-shut down” ang signal sa tanang cell site sa ruta sa Sinulog.