TULO ka mga balaudnon ang gikatakdang ipalabang ni Kong. Samsam Gullas ngadto sa Kongreso alang sa dakbayan sa Taliay.

Kini maoy gibutyag ni Mayor Eduardo Gullas atol sa iyang paghatag og mayor performance report atol sa session sa konseho kagahapon.

Nagkanayon si Gullas nga iyang gihangyo ang iyang apo nga kongresista nga mopalabang og tulo ka balaodnon alang sa Talisay.

Una mao ang paghimo nag state college sa Talisay City College aron ang pundo sa tunghaan gikan na sa nasudnong kagamhanan ug libre na unya ang pagtungha sa mga kabataan.

Ikaduha paghimog Talisay Medical Center sa Talisay District Hospital.

Matod niya Gullas nga sa 19 ka mga hospital nga iya sa lalawigan ang Talisay District Hospital lang ang wa ma-turn over sa Kapitolyo ug nagpabilin kining iya sa Department Health.

Samtang kon mahimo kining Talisay Medical Center dugang pundo na unya ug pagpadako sa tunghaan ug labaw sa tanan ang libre na unya nga dialysis.

Ang ikatulong balaudnon mao ang paghimog Talisay Water District aron mapahimuslan sa Talisay ang ilang tubig inay kuhaon sa Metro Cebu Water District ug ibaligya sa ubang lugar.

Lakip sa gipahibawo ni Gullas nga karong sunod tuig dako ang posibilidad nga moabot na sa usa ka bilyon ka pesos ang budget sa siyudad.

Una iyang gipasalamatan ang konseho sa daling pagpalabang sa iyang gipangayong budget nga kapin sa P800 milyones.

Samtang gipasigarbo usab sa mayor ang ilang mga nahimong proyekto sud lang sa pipila ka buwan sa katungdanan sama nalang sa nagpadayon karon pagtukod sa merkado sa Tabunok nga mahuman karong buwan sa Mayo.