PATAY ang usa ka Japanese National human giingong naghikog gamit ang pagpusil sa kaugalingon alas 8 sa buntag niadtong Lunes, Enero 9.
Ang insidente nahitabo gawas sa iyang balay sa Amethyst Street, Hillside Subdivision, Bajada, dakbayan sa Davao.
Ang report sa Buhangin Police Station nag-ila sa biktima nga si Akitaka Oba, 67, lumad nga taga Shizuoka, Japan.
Sa inisyal nga imbestigasyon nila Senior Police Officer 1 Ruben Corsino ug Police Officer 3 Aldrin Baquial, nasayran nga wala nay kinabuhi nga napalgan gawas sa iyang balay ang biktima kinsa nakalingkod sa monobloc chair ug dunay pusil sa iyang kilid.
Giingong usa ka personahe sa Criminal Investigation and Detection Group-Davao Region ang nakakita sa biktima hinungdan nga nanawag kini sa kapolisan sa Buhangin.
Nasuta sa Scene of the Crime Operations (Soco) nga dunay igo sa baba ang biktima nga milapos sa tangkugo ug mipadulong ang bala sa ilang kisame.
Narekober sa crime scene ang kalibre .45 nga pistola nga dunay usa ka buhing bala nga iya sa biktima.
Duna say suwat nga napalgan nga nagpahibalo nga kontakon ang tawo kung unsay mahitabo kaniya.
Ang higala sa biktima nagbutyag nga gituohang nag-suicide ang biktima gumikan sa gihambin niini nga balatian nga gisugilon kaniya sa wa pa mamatay.
Naa na sa Angel Funeral Parlor ang patay nga lawas sa biktima.