Task Force Haribon magbantay sa kadagatan sa Asean Summit

NSFA, Panacan, Davao City -- Ang Joint Task Force (JTF) Haribon sa Eastern Mindanao Command nag-alerto sa tanang component units isip suporta sa Philippine National Police sa pagbantay sa launching sa Asean Summit 2017 karong Enero 15, 2017 sa Davao City.

Sa inisyal, mokabat sa 600 ka personahe gikan air force, navy, ug army ang komitado ngadto sa kapin 1,000 nga personahe nga gi-deploy isip bantay sa nagkadaiyang aktibidad labot sa maong launching.

Si Brigadier General Gilbert Gapay, JTF Haribon commander, nagsulti nga ang planong suporta sa JTF Haribon naglangkob sa nagkadaiyang senaryo partikular ang Disaster Response, Terrorism, and Internal Security Operation.

Dugang ni Gapay nga ang sea, air, ug land capabilities and assets naka-istambay alang sa maong aktibidad.

Kabahin sa preparasyon, naglusad sila og mga exercises sa Davao Gulf aron mapakusog ang seguridad sa kadagatan.

Ang aktibidad gitambongan sa mga tag-iya sa resorts, security providers, ug lokal nga gobyerno sa Island Garden City of Samal. (AD)