SIKOP ang usa ka suspetsado nga tigpayuhot sa ginadili nga droga kinsa giingong mitahan na sa Oplan Tokhang kaniadto atol sa drug bust niadtong Lunes, Enero 9, alas 7:49 sa gabii sa Cogon Market, JR Borja Street, Barangay 33, dakbayan sa Cagayan de Oro.
Nasikop si Bertoldo Ebiola Ampong, 30, ulitawo, taga Capt. Vicente Roa Street, Barangay 24 ning dakbayan.
Sa nahipos nga impormasyon gikan sa Police Station 1 sa Divisoria gikabutyag nga nasikop ang suspek human sa gipahigayong drug bust sa pagpangulo ni Police Senior Inspector Maricris Mulat.
Napalitan ang suspetsado og pakete sa shabu ug nakumpiska gikan niini ang mokabat sa 2.1 gramo nga shabu nga gibana-banang may kantidad nga P14,500.
Nasayran nga mitahan na sa buhatan sa kapolisan sa Police Station 2 sa Cogon ang suspek ilabi na diha sa Barangay 24 ning dakbayan apan nasutang nagpadayon pa gihapon kini sa ilegal nga kalihokan hinungdan nga gipahigayonan kini sa operasyon.
Sa pagsulat niini nga balita ang maong suspek ang nagtingkagol na sa Maharlika Detention Celll ning dakbayan.