NAPALGAN sa basurahan ang usa ka patay nga fetus nga gisulod sa usa ka plastik nga sudlanan og tubig niadtong Domingo sa hapon sa Zone 10 Landfill Dumpsite, Zayas, Carmen, Dakbayan sa Cagayan de Oro.
Gibana-banang anaa sa 3 ngadto sa 4 ka bulan ang maong fetus nga napalgan sa basurahan.
Sa inisyal nga imbestigasiyon sa kapolisan sa Carmen, nasayran nga usa ka 13 anyos nga batang lalaki nga tigpangaykay, kinsa lumulupyo sa Zone 10, Phase 4, Zayas, Carmen ang unang nakakita niini.
Gi-ingong dali nga gihatag sa bata ang maong fetus ngadto kang Joseph Ramiso, gate in-charge sa dumpsite.
Nasayran nga usa ka mini dump truck gikan sa usa sa mga balay tambalanan ning dakbayan ang naghatod sa mga basura niadtong higayona ug lakip na ang maong sudlanan sa tubig diin gisulod ang maong fetus.
Ang fetus kasamtangang anaa sa Bollozos funeral homes sa Bulua Highway ning siyudad alang sa tukmang disposasiyon.