GIBUTYAG ni Polie Chief Inspector Lemuel Gonda, hepe sa Operation and Plans Branch sa Cagayan de Oro City Police Office (Cocpo), nga full deployment ang gihimo nila aron mobantay sa palibot kagahapon sa unang adlaw sa pag-abli sa publikong tunghaan.

Kini tungod kay apil sa ilang gipadumala mao ang mga personahe gikan sa headquarter nga magbantay sa kadalanan.

Gimandoan na usab ang tanan nga mga police station sa pagbantay sa ilang area of responsibility hilabi na kadtong aduna'y mga tunghaan sa dapit.

Hinuon giklaro ni Gonda nga ang kapolisan taman lamang sa gawas sa tunghaan ug mosulod lamang sila sa tunghaan kung aduna'y tawag o mangayo og assistance.

Mamatikdan usab ang gipahimutang nga mga police assistance desk sa nagkadaiyang tunghaan.

Ang mga traffic enforcers gikan sa Road and Traffic Administration (RTA) nakabantay gihapon sa kadalanan aron pagpahapsay sa dagan sa trapiko apan dili malikayan nga nahitabo gayod ang pagkalangan hilabi na sa area sa Velez nga bahin.

Gisaway usab sa pipila ka mga motorista ang wala pag-andar sa pipila ka mga traffic light sa dakbayan nga mao'y hinungdan sa pagkabalda sa trapiko.