DUNGAN sa pagbukas sa unang adlaw sa klase kagahapon gilusad usab sa mga magtutudlo ang ilang protesta aron ipa-abot ang ilang hangyo ngadto sa gobiyerno nga patas-an ang ilang sweldo ug ang pagsuspenso sa K to 12 program.
Si Ofelia Tabacon, Vice Chairman sa Alliance of Concern Teacher-Northern Mindanao mibutyag nga ilang gihimo ang protesta pinaagi sa pagsul-ob og armband.
Matod ni Tabacon bisan og nagsugod na ang klase dili pa gihapon ulahi ang tanan tungod kay buot nilang ipakita sa gobiyerno nga wala sila nahimuot sa bag-ong programa.
Gawas niini wala sila nalipay sa suholan sa mga magtutudlo hilabi na ang mga ‘newly hired teachers’ nga gi-ingong nagdawat og P18 mil kapin matag bulan, wala pay labot niini ang mga deduction.
Usa sa ilang gilantaw nga suholan nga moabot kini sa P25 mil ngadto P30 mil tungod kay mosubay man sab sila sa salary standardization law ang ubos niini gitawag na nga poverty line.
Hinoun ang mga magtutudlo taliwala nga nagsul-ob og armband padayon gihapon sa paghimo sa ilang trabaho sa unang adlaw sa klase.
“Magtrabaho gihapon mi pero pinaagi sa among pagsul-ob og armband at least mabati sa atong gobyerno nga dili mi kuntento ani,” butyag ni Tabacon ug dugang nga miingon nga kung dili usab sila magpakabana daw magpasagad lamang ang gobyerno nga nalipay ug kuntento sila sa ilang suholan ug sa gilusad nga bag-ong programa.