Dear Noy Kulas,

Tawga lang ko og Enel, 29 anyos na ug nagtrabaho. Taga Cebu ko pero nia na sa abroad nagtrabaho. Di lang nako idetalye kay basin dunay makaila nako.

Ang akong problema, Noy, kabahin ni sa akong girlfriend nga naa diha. Sa nag-eskwela pa siya sa college, nitabang ko og gasto niya aron makahuman siya kay di kaya sa iyang parents ang paggasto. Pila ray dagan sa panahon, nakahuman siya. Pwerte nakong lipaya.

Karon, nagtrabaho na siya sa usa ka kompaniya diha sa atoa. Maayo ra gihapon ang among communication sa pagsugod niya og trabaho hangtod nga nagkaanam na og panagsa tungod kay busy na kuno siya. Nituo ra sab ko kay ingon ana ang ubang mga trabaho. Apan akong nabantayan sa iyang Facebook ang usa ka lalake nga hapit tanang pictures sikit niya. Ako siyang gipangutana parte ani. Ingon niya iyang amigo nga bayot kuno. Akong gi-stalk ang lalake ug akong nahibaw-an nga di ni bayot.

Naglibog ko kon unsaon nako siya pagpangutana kay basin masuko. Inlove kaayo ko sa akong uyab. Magsige gani gihapon ko pagpadala og kwarta niya aron duna mi matigom para sa among future. Naglibog na ko ron unsay akong buhaton. Nagkinahanglan ko sa imong tambag, Noy.

ENEL

Nel,

Di tuod na lalim kay dako ka na og investment unya lain ang moani. Mao bitaw nay disadvantage sa mga relasyon nga layo kay dunay mga outside forces ang makaapekto. Magkabuwag pa man gani ang magtiayon, unsa na kahang uyab pa?

Pangutan-a siya parte anang mao nga lalake. Pahibaw-a siya nga nakahibawo ka namakak siya. Pahibaw-a siya nga nagselos ka kay natural lang sa partner nga magselos kon dunay mabantayan nga di maayo. Ayaw kahadlok kay bisan unsaon pa nimo, kon mokalas nang imong uyab sa inyong relasyon, mobiya gyud na. Maayo nang samtang karon imo nang masukod kon loyal ba siya nimo o di. Kay sa unyag uli nimo diri, anha na ka mahibawo nga iya ka nang giilisan. Mas sakit na, di ba?

Pangutana sa inyong common friends nga suhito sa inyong relasyon kay basin dunay ikatug-an. Kon di man gani, pa­malihug sa imong mga suod o pamilya aron makapaniid sab niya og panagsa. Makasusi in your behalf. Kon tinuod diay imong mga pagduda, mas maayong mahibaw samtang sayo. Aron usab maputol nimo imong pagpadala ngadto niya.

NOY KULAS

(Alang sa imong problema, e-mail sa kulassuper@sunstar.com.ph)