WANTED sa kasong murder sa lungsod sa San Remigio, amihanang Sugbo nasikop sa kapulisan human sa kapin sa tulo ka tuig nga pagtago-tago.
Si Roy Mayol Sinangote, 31, lumad nga taga-Sityo Maycan, barangay Lawis, San Remigio, Sugbo, gikatakdang i-turnover ngadto korte sa Bogo City diin aduna siyay kasong pagpatay nga gi-atubang.
Ang San Remigio Police Station nga gipangulohan ni PSInsp. Audie Pelayo nakig-alayon sa Lapu-Lapu City Police Office Intelligence Branch sa pagdakop kang Sinangote nga sa Lapu-Lapu nagtago-tago.
Malampuson nga nasikop sa kapulisan si Sinangote niadtong Enero 10 sa ala 1:00 sa kadlawon sa Purok Tambis, barangay Canjulao, Lapu-Lapu. Si Sinangote adunay warrant of arrest nga giluwatan ni Judge Antonio Marigomen, Regional Trial Court, Branch 61 sa Bogo City, Cebu niadtong Agosto 28, 2013 sa kasong murder.