HUMAN gibahaan ang pipila ka bahin sa habagatang Sugbo tungod sa ulan nga dala sa bagyong Auring nga nahimo nang low pressure area (LPA), mga dapit na sab sa amihanang Sugbo ang gipangbahaan.
Ang gipangbahaan mao ang mga lungsod sa Consolacion, Catmon, Sogod ug dakbayan sa Danao.
Ang mga barangay sa Consolacion nga gipangbahaan naglakip sa Cansaga, Pitogo, Danlag ug Jugan, diin halos 200 ka mga pamilya ang gipabakwit.
Tungod sa padayon nga pag-uwan, gitambagan ang evacuees sa Cansaga nga di lang una mamalik sa ilang mga pinuy-anan apan sigun ni disaster management officer Danilo Capangpangan, duna gyuy pipila nga nipugos pagpauli.
Kagahapon sa udto nisaka na usab ang tubig sa Cansaga river tungod sa pag-ulan.
Dugang niya, lakip sa mga makapaawas sa Cansaga river ug makamugna og baha mao ang panagsugat na sa tubig gikan sa bukid ug pagtaob sa dagat.
Duha ka mga insidente sa landslide ang natala sa lungsod sa Consolacion nga giuwan sukad pa niadtong Dominggo hangtod kagahapong adlawa.
Samtang niadtong Martes, moabot sa 45 ka mga pamilya gikan sa tulo ka mga barangay sa lungsod sa Sogod gipabakwit tungod sa baha.
Lakip sa mga barangay nga gibahaan ang Damulog, Pansoy ug Poblacion.
Gitug-an sa tigpamaba sa Provincial Disaster Risk Reduction Management Office (PDRRMO) Julius Regner, bisan ang mga evacuation center nga gidalhan sa mga bakwit gibahaan tungod kay naa sa ubos nga bahin, ilabi na sa brgy. Poblacion. Di na maagian ang usa ka provincial road paingon sa Brgy. Pansoy.
Gawas sa pagbaha, duha ka mga insidente sa landslide ang natala usab sa lungsod sa Consolacion.
Gitug-an ni Capangpangan nga sa landslide Brgy. Cabangajan, usa sa mga mountain barangays sa lungsod, usa ka abandonadong balay naguba human naapil pagdahil sa yuta. Wa hinuoy naangol sa maong hitabo.